Bomb puakah ULFA leh GNLA helte'n mawh an phur: M'laya police

Kar kal ta Inrinnia, East Garo Hills khawpui, Williamnagar-a tualchher bomb puakah Garo National Liberation Army (GNLA) helte chuan an inhnamhnawih loh thu sawi mah se Meghalaya Police chuan bomb chu GNLA leh United Liberation Front of Asom (ULFA) helte ṭangrualte tihpuah a ni, a ti.

Senior police official chuan GNLA leh ULFA helte inhnamhnawihnaah finfiahna an neih ṭhat thu sawiin, bom puak chu tun hnaia GNLA hotu, Sohan D. Shira leh ULFA helpawla Deputy Commander in Chief, Drishti Rajkhowa te inbiakna rahchhuah a ni, a ti.

Sorkar nena inbiak duh lo pawl, ULFA hotu, Rajkhowa hi tunah Bangladesh ramah a awm mek tih police thuchhuak chuan a tarlang a, Garo Hills-ah hian hmelhriat a neih ṭhat bakah Garo ṭawng pawh a thiam niin an sawi. Kum 2011 thlenga ULFA battalion 109-a commander a nih laiin Garo Hills-a pawikhawihna lian tham tam takah a lo inhnamhnawih tawh a ni, an ti.

Security force te'n Garo Hills-a GNLA helte dapchhuah beihpui an thlak, Operation Hillstorm an neih laia GNLA hotu Sohan D. Shira Bangladesh-a a tlanchhiat aṭangin ULFA leh GNLA helte thawhhona hi a nghet zual niin police thuchhuak chuan a tarlang.

GNLA helte chu ULFA hel zinga tualchher bomb siam thiam, Apria-a'n bomb siam dan a zirtir tih Meghalaya police chuan a tarlang bawk a, kar kal ta Inrinnia Williamnagar bazar-a bomb tipuak turin GNLA chuan a commander pahnih- Jimmy leh Megam te chu a hriattir a ni, a ti.