Manipur : Tribal pawlin AFSPA hman leh phût

Manipur-a Imphal Valley-a Indian Army sipai, sepoy Serto ThangthangKom thah a nih hnuah, tribal pawl, Committee on Tribal Unity (COTU) chuan sorkar laipui hnenah Imphal Valley huam chhungah Armed Forces Special Powers Act (AFSPA) hmang leh turin an phût.

Sipai hnena thuneihna sang pekna, AFSPA hi kumin March 24 khan Wangol, Leimakhing, Nambol leh Moirang police station huam chhungah tihtawp a ni.

COTU chuan chhun khaw engah rawng taka sipai thah a ni chu an dem thu sawiin, 'Meitei misualte chu Imphal Valley-a pawikhawihna thlen turin zalen taka an teivel phalsak an ni," an ti. He thil thleng hian Manipur chu mipui thlan sorkarin a enkawl tawh lo a, thliar bik nei thuneitu inluling takte kutah a awm tawh tih a tilang chiang hle niin an sawi bawk.

"State police-te chuan Imphal Valley-ah an duty an hlawhchham avangin COTU chuan valley-ah AFSPA chu hmang leh turin a phut a, hei hi pawisawi lote chunga Meitei misualte pawikhawihna rapthlak tak tak thleng tur a venna turin sorkarin kawng a neih chhun a ni," tiin an sawi.

COTU chuan Indian Army hnenah misualte kut tuara thi, an sipai tan rorelna dik kalpui turin an phut a, "Meitei misual leh fake commando-te chuan Indian Army ropui leh thil tihtheihna an hre nawn leh dawn a ni," an ti.

Indian Army sipai, chawlh mang mek Sepoy Serto Thangthang Kom chu September16 khan a chenna Tarung, Neikanlong, Happy Valley, Imphal West aṭangin misual pathumin ralthuam nena vauin an hruai chhuak a, a tuk zing dar 9:30 velah a ruang hi Imphal East-a Khuningthek khuaah hmuh a ni. A lu-ah silaia kah a ni.