Singapore aṭangin Assam CM chawimawina hlan

Assam chief minister Himanta Biswa Sarma chu khawtlang tana a hnathawh ṭhat avangin Singapore-a Lee Kuan Yew Exchange Fellowship chuan chawimawina an hlan niin Pathianni khan Chief Minister Office thuchhuahah an tarlang. Himanta hi Lee Kuan Yew mi leh sa anga Singapore tlawh tura sawm a ni bawk.

Kum 1991-a din, Lee Kuan Yew exchange fellowship hian mimal, an ram hmasawnna atana hnathawk ṭha leh Singapore nena thawhhona nei tura hma la ṭhate hnenah chawimawina hi a hlan ṭhin a, Singapore founding Prime Minister, Lee Kuan Yew hriatrengna atana an tih a ni.

Official thuchhuahah chuan CM Himanta hi hmasawnna hnathawh kawngah leh khawvel ralmuanna atana hma la tak taktu a nih avanga chawimawina hi pek a ni tih tarlan a ni. Sarma hi Assam Chief Minister zinga he chawimawina hlan hmasak ber a ni a, India ram ang chuan union minister hlui Arun Shorie, Madhya Pradesh chief minister Shivraj Singh Chouhan leh Planning Commission Vice Chairman hlui, Montek Singh Ahluwalia te pek an lo ni tawh.

Himanta chuan, "Chawimawina ropui tak hlan ka ni tur hi thinlung tak takin ka lawm. He chawimawina hi ka mimal hlawhtlinna ni loin, khawvel mit hmuha Assam dinhmun sang leh ṭhang chho zel entirna a ni," tiin a sawi.