Nagaland-ah Union Minister-in Vishwakarma scheme tlangzarh

Union minister of state for fisheries, animal husbandry and dairying, Sanjeev Baliyan chuan Pathianni khan Kohima tlawhin, PM Vishwakarma scheme a tlangzarh. Baliyan chuan PM Vishwakarma scheme tan Rs. vbc 13,000 dah a nih thu leh, sorkar laipuiin a tum vek tur thu a sawi.

He scheme hnuaiah hian Common Service Centre-ah PM Vishwakarma portal hmangin a thlawna in-register tur a ni dawn a, in-register te chu certificate leh ID card siamsak an ni ang a, basic leh advanced training pek vek tur niin, hmanraw mamawh leina atan Rs. 15,000 pek an ni bawk dawn a ni. Union minister chuan scheme chu India rama thingtlang leh khawpuia kut themthiam thil neite ṭanpuina atana buatsaih a nih thu a sawi. He scheme kaltlang hian sorkar laipui chuan thiamthil hmasawnna tur atana thawh bakah, ngaihtuahna thar atana hmalak te, entrepreneurship hmanga eizawnna tlak buatsaih tum a nih thu a sawi bawk.

PM Vishwakarma scheme hian kut themthiam thil 18 a huam dawn a, heng; mitiri, lawng siam, hriamhrei siam, thir chher, tubih leh hmanraw dang siam, tala siam, rangkachak chher, bungbel siam, milim siam, lung chher, pheikhawk siam, lung mitiri, lu met, huan siam, puam ṭhui, len siam leh in chhung mamawh thil chi hrang hrang siamte a huam ang.