CM Mukul-a'n dan leh thupek dinhmun a ennawn

Kar kal ta Inrinnia, East Garo Hills khawpui, Williamnagar-a tualchher bomb tihpuah a nih hnuah Meghalaya Chief Minister Mukul Sangma chuan Thawh-
ṭanni khan Garo Hills-a dan leh thupek dinhmun ennawnin, high level meeting a ko.

Meeting-ah hian police official te chuan Garo Hills-a helte laka beihpui thlakna an kalpui dan chungchang Chief Minister hi hriattir a ni a, helte chet chhuah theihna lak aṭanga inven nan Chief Minister Mukul chuan police te chu tualchhung mite nena an thawhhona tinghet turin a ngen.

"Khawlaiah a neitu awm lo bag emaw thil rihhlelhawm hmuh a nihin police te hriattir vat turin mipuite hriattir an ngai a, police te pawhin hetiang hunah hian rang taka an chetchhuah theih nan 'quick response team' an neih a ngai a ni," tiin Mukul chuan a sawi.

Chief Minister chuan kawng-puia inkalpawhna chu mipui tan a him a pawimawh thu sawiin, hemi atan hian a bika hmalak a
ṭul thu a sawi a, office tinte pawh anmahni dawrtute lo ngun taka lo thlithlai tur leh office chhung venhimna lam ennawn ṭhin tura a duh thu a sawi.

Williamnagar-a bomb puak chu a dem thu sawiin Mukul chuan district headquarters zawng zawngte chu “safe secure cities and towns” programme hnuaia dah a rawt.

Police official te chuan Chief Minister chu bomb puah hnuah pawikhawihtute dapchhuah beihpui an thlak dan leh ULFA helte leh GNLA helte thawhduh dan chungchang an hrilh.

Hetihlai hian East Garo Hills Deputy Commissioner CVD Diengdoh chuan bomb puaka hliam tuar zingah thi an awm loh thu sawiin, Williamnagar-ah boruak a ralmuan tawh thu loh bazar te pawh hawn a nih tawh thu Thawhṭanni khan a sawi.

District thuneitute chuan venhimna kawngah theihtawp an chhuah thu sawiin, bazar hmunah pawh police tam zawk duty tir an ni, a ti.