KMSS-in pemlutte dodalna nawrh huaihawt

Sorkar laipuiin kum 2014, December 31 hnu lama Bangladesh aṭanga non-Muslim mi, India rama rawn lutte hnena India-a awm phalna a pek dodalna atan Assam-a loneitu pawl, Krishak Mukti Sangram Samiti (KMSS) chuan Thawhṭanni khan Guwahati leh district headquarters zawng zawngah nawrh a huaihawt.

Loneitu pawl chuan sorkar laipui thutlukna hian pemlutte avanga Assam harsatna a tihzual tur thu tarlangin, rampawn mite chu eng sakhaw zuitu pawh ni se ngaihhnathiamna siamsak a duh loh thu a tarlang.

Hetihlai hian KMSS chuan Lower Subansiri Hydroelectric Project-a hnathawh chhunzawm leh mek chu a dodal thu a tarlang bawk.

"Kum 2011-a hna chawlhsan tawh, Lower Subansiri Hydroelectric Project-ah National Hydroelectric Power Corporation (NHPC) chuan a rukin hna a chhunzawm leh a, sorkar laipui pawh tuikhuah lian tham tak siam ṭhin hi kan dodal thu vawi eng emaw zat kan lo hriattir tawh a ni," tiin KMSS thuchhuak chuan a tarlang.

KMSS chuan sorkar laipui chu Lower Suban-siri Hydroelectric Project hi chawlhsan tura a phut bakah an thil phut chu a hlawhtlin loh chuan lian tham zawka a dodalna kalpui an tum thu a tarlang.