SC-in Arunachal CM kar thum hun a pe

Mi pathumin sum tichingpena an puhna chhangletna atan Supreme Court chuan Arunachal Pradesh Chief Minister Nabam Tuki chu kar thum hun a pe.

Chief Minister office thuchhuak chuan Tuki-a laka thubuai thehluttu mi pathumte hi- Nabam Tagam, Yakur Tara leh Tana Naya te an ni, a ti a, Justice RK Agrawal-a kaihhruaina hnuaiah Supreme Court chuan Thawhṭanni khan he thubuai hi a ngaihtuah a ni.

Court chuan Tuki chu kar thum chhunga insawi-fiah turin a hriattir a ni.

Sum tichingpena Chief Minister puhtute zinga mi, Nabam Tagam chuan a hmain Gauhati High Court-a public interest litigation (PIL) a thehluh chu a lo hnukkir tawh a, mahse Yakur Tara leh Tana Naya chuan state sorkar chu disaster management fund tichingpena puhin, Gauhati HC-ah hian PIL an thehlut a ni.

Nikum August thla khan Gauhati HC chuan sum tichingpena Tuki-a puhna hi chhui turin Central Bureau of Investigation (CBI) a lo hriattir tawh a ni. Mahse High Court-in CBI chhui tura thuchhuah a siam hi Supreme Court chuan a 'stay' sak a ni.

Kum 2006-a PWD Minister a nih laiin Tuki hi sum tichingpen leh dik lo taka a chhungte contract pea puh a ni.