Tripura-ah mahni intihlum an tam

Mahni intihhlum ven nan state sorkarin theihtawp chhuah mah se kum 2015, February leh December inkarah Tripura-ah mahni in-tihlum an tam hle.

Chief Minister Manik Sarkar chuan Thawhṭannia state Assembly inkhawma zawhna a chhannaah kum 2015, February leh December inkara mahni intihlum zat tarlangin, mi 674 an intihlum a, ni khata mi pakhat zel intihlum aiin an tam zawk a ni.

Sarkar hian kum hmasa lam report tarlang nghalin, kum 2012-2013 khan Tripura-ah mi 617 an intihlum a, kum 2013-2014-ah mi 744 intihhlumin, kum 2014-2015-ah mi 670 an intihlum a ni.

Mahni intihlum zat chungchangah hian Congress MLA Ratanlal Nath-a'n zawhna a siam a, 'unstarred' question a nih avangin hemi chungchang hi House-ah sawizui theih a ni lo.

MLA Nath-a zawhna dang chhannaah state Law Minister, Tapan Chakraborty chuan Indian Penal Code (IPC) tlawhchhana thubuai siamsak, thiam loh chantir zat chu 15.85% a ni, a ti a, kum 2013 leh 2014 khan IPC hnuaia thubuaia thiam loh chantir zat chu za zela 10.89 leh 13.59 a ni.