Hamilton leh Mercedes an la inbe lo

Lewis Hamilton chuan contract thar chungchangah a team Mercedes nen inbiakna an la neih loh thu a sawi. British tlangval hian a team awm mekna tan hian season thar lo awm tur tawp thleng daih bak contract a nei tawh lo a ni.

F1 champion vawi ruk ni tawh Hamilton hi Mercedes lam chuan hun rei zawk atan chelh an duh, inbiakna pawh an nei tawh angin an sawi hial. Mahse, an driver zawk hian an inbiak rih lo thu a rawn sawi chhuak ve leh ta thung.

Instagram lamah Hamilton chuan Mercedes F1 boss Toto Wolff nen an chungchang sawiin, "Contract chungchang inbiakna a la awm lo, inremsiamna pawh a la awm lo," a ti. Media lam chuan Mercedes hian Hamilton duh leh beisei ang an ti hlawhtling ngam rih lo niin an sawi.

Kum 35 mi Hamilton hi tunah chuan thlasik chawlh neiin hun a hmang mek a, a kum tam ve deuh tawh mah se tun hnaiah amah elphak driver dang an awm meuh lo - season thar lo awm turah pawh champion tura rinkai ber a ni leh ang.

Season hmasa kharna Abu Dhabi Grand Prix an tlan hnu khan Hamilton hian a team awm meknaah a hlim tawk thu a sawi tawh. Amaherawhchu, nikum chhung zawng khan an elpui Ferrari car a ṭhat thu leh an tlan chak thu a sawi fo, hei hian a rilru zawng zawngin Mercedes a ring zo lo deuh niin a ngaih theih.