Sawi zui hlawh Ballon d'Or
Thawhṭanni zan khan Lio-nel Messi-a'n a vawi nga nan Ballon d'Or chawimawina a dawng a, Argentina captain ropui zia an sawi nasat rualin Ballon d'Or kalphung hrim hrim sawiselna pawh a ri hnem hle.
Lungawi lo an tam
FIFA hnuaia ram zingah Football Association of Indonesia leh Kuwait Football Association te chuan hrem an nih vangin Ballon d'Or-ah vote an thlak thei lo a, anni bakah hian lungawi loh vangin Italy coach Antonio Conte leh captain Gianluigi Buffon te'n vote an thlak lo.
Italian keeper ṭha Buffon hi October 2015-a Ballon d'Or chawimawina dawng thei tur player 59 thlan chhuah zingah a tel lo. Juventus-a Buffon khelhpui Paul Pogba pawhin kum 37-a upa Italian keeper tel lo chu mak a tih thu a sawi nghe nghe.
Buffon telh a nih loh lai hian goalkeeper zingah Barcelona keeper Claudio Bravo, Bayern Munich keeper Manuel Neuer, Chelsea keeper Thibaut Courtois, United keeper David de Gea leh Arsenal keeper David Ospina te telh an ni. Kum 2015 khan Juventus keeper hian a club khelhna chu Italy-a nomawi chawi theih zawng zawng a chawi pui a, a tir aṭanga hmaih tur chi a ni lo.
Nomination-a Gigi Buffon lan hnuhnun ber chu kum 2013 kha a ni a, kum 2008 khan a zawna a vawi ruk nan nomination a hmu a, kum 2006-ah pahnihna a ni.
Italy lam an lungawi lo a, chawimawina dawng zinga club langsar ber Barcelona lam pawh an lawm lo niin a lang. Team of the year-ah Catalan club zinga player pawimawh Luis Suarez, Gerard Pique leh Sergio Busquets te hming a lan loh laiin kum 2015-a inhliam vanga thla engemaw zat chawl Real Madrid midfielder Luka Modric hming a lang.
Ballon d'Or Gala-ah coach of the year dawngtu Luis Enrique a inlan lo a, khawthlang media zingah Barcelona boss hi lungawi loh vanga inlan loa puh tawk an awm.
Catalan club lawm loh danah thuchiang a awm lo a, 2014 FIFA World Cup champion Germany captain Philipp Lahm erawh a lungawi lo tih a chiang. Bayern captain Lahm chuan, "Khawvela player ṭha ber thlan dan hi ka ngaihtuah nawn fo a, Ballon d' Or dawng turin ram tana che
ṭha lo pawh inelna lian thama an chet ṭhat chuan thlan theih an ni. Player thlan chhuah sa aṭangin player pathum thlan a ngai a, a thlangtute hian an rilrua langsar an thlang mai
ṭhin. Hei vang hian a tawpah chuan khawvela striker ṭha berte'n an dawng leh ṭhin," tiin a thlangtute'n Messi leh Ronaldo te an en kan hleih theih loh thu a sawi.
Messi nge nge
Lungawi lo awm bawk mah se Ballon d'Or dawngtu Lionel Messi-a'n vote 498 aṭangin 41.33% a hmu pha a, chawimawina dawn hi a phu tih a chiang hle.
Messi elpha ber Cristiano Ronaldo pawhin Argentina captain hi a fak hreh lo, ceremony neih hma interview-ah Real Madrid forward chuan, "A ke vei lam hi a ṭha takzet a, neih ve a châkawm khawp mai," tiin a sawi a. Hetihlai hian Neymar pawh a insum duh bik lo, Brazilian forward chuan, "Kei chuan a ke pahnih ang neih ka duh," tiin Messi-a'n a ke pahnih a hman thiam thu a lo sawi ve bawk.
Barcelona forward Neymar chuan sawi zuiin, "Player ṭha pahnih bula ka tel ve thei ka lawm hle a ni. An ṭhat vanga helai hmuna tel thei hi an ni," tiin a tluk tak loh pahnihte chu a fak.
Ballon d'Or award hnu-hnung pariat hi Ronaldo leh Messi ten an insem a, anni hi forward ropui an ni. Player
ṭha pahnih hian chawimawina an in dawn chhawk hi a mak lo a, chutihrualin thlirna tlang dang aṭang chuan football coach-in team ṭha a din dawnin forward chiah a thlang lo a, chuvangin tlarhnung lam player tan chuan tuna an thlan duh dan kalhmang hi chu a lawmawm loh khawp ang.