Federer-a'n Serena a dah sang

Roger Federer chuan khawvel hmeichhe tennis player zinga deh khirh bera ngaih Serena Williams chu kumina Grand Slam title la leh thei tura a la ṭhat tawk thu a sawi.

World number 1 Serena hi nikum khan Australian Open, French Open leh Wimbledon-ah te a champion a, an rama khelh US Open-ah erawh a vanduai thung. Grand Slam tournament-ah vawi 21 champion tawhin Steffi Graf record vawi 22 champion chu a tluk teuh tawh hle.

Grand Slam vawi 17 champion tawh Federer chuan, "Serena hi a hriselna a ṭha a nih phawt chuan kuminah hian hmeichhe player dang tan hneh a harsa leh ang tih ka ring. Tun dinhmunah chuan Novak Djokovic nen hian an vanglai an hmang mek a, midang tan hneh an harsa hle a ni. A bik takin Williams hian hun rei tak chhung ṭha taka a lo khelh tluan tawh avangin ani hmachhawn hi a harsat lehzual ka ring," a ti.

Karleh Thawhṭan-ni aṭang hian kumina Grand Slam hmasa ber tur Australian Open chu Melbourne Park-ah an khelh ṭan leh tawh dawn a, he inelnaah hian Williams hi kum 2003, 2005, 2007, 2009, 2010 leh 2015 te khan a lo champion tawh a ni.

Simona Halep pawh in Serena chu hma-chhawn hautak a tih thu a sawi a, mahse world number 2 hian hneh thei tura inrintawkna a neih thu a sawi tel bawk.