Higuain lei theih inbeisei lo Bayern CEO

Bayern Munich chief executive Karl-Heinz Rummenigge chuan Napoli striker che ṭha tak Gonzalo Higuain chu Allianz Arena lamah lakluh ngei an duhthu a sawi a, mahse Napoli lam hian an striker hi an hralh phal a rin loh thu a sawi nghal.

Argentina international Higuain hi tun season-ah a che ṭha hle a, league match 19 a inlan tawhah goal 18 khungin Serie A top scorer a ni mek a, league table chung berah Napoli chu a awmpui bawk.

Rummenigge chuan Higuain chu a player duhzawng tak a nih thu sawiin, "Zep lohah chuan Higuain hi kan player duhzawng tak a ni a, tun hnaiah a khel ṭhat theih em avang pawhin a hlim hle ang. Kan player duhzawng tak ni mah se ka ṭhianpa Napoli president Aurelio De Laurentiis hian hralh a phal ang em? tih hi kan buaina chu a ni," a ti.

Argentina tan vawi 52 a inlana goal 25 khung thei Higuain hian tun season-ah Napoli tan inelna hrang hrangah match 23 khelin goal 20 a khung tawh a, Bayern Munich-in an hnena khel tura an duh hi a awm lo hran lo.