Aston Villa an chak ve ta

Premier League table mawngphah luahlumtu Aston Villa chuan tun season-a a vawi hnih nan chakni hmel an hmu ve leh ta. Thawhlehni zan khan an mikhual Crystal Palace chu 1-0 in an hneh.

Villa Park-a inkhelah mikhual Palace tan Wilfried Zaha chuan minute 42-naah goal ban pet perin a team te hma a hruai pui teuh hle. Manager Remi Garde enkawlna hnuaiah Villa tan vanneih ni a inher chhuak ve ta a, minute 58-naah defender Joleon Lescott chuan corner aṭanga ball lo kal chu a tauh lut a ni.

England defender Les-cott a ball tauh hi Crystal Palace goalkeeper tan awlsam taka lo man mai theih tura ngaih ni mah se Wayne Hennessey chuan man pialin ho ang reng takin goal an phurh phah a ni.

Inkhel tawp thlenga goal dang a luh belh tawh loh avangin Villa-in an khelmualah point thum an hmu a, match 21 khelh tawh aṭanga point 11 hmuin table mawngphah-ah an la awm. Relegation zone chung chiaha awm Swansea chu point sarihin an phak lo mek a ni.

Eng nge an sawi?

Aston Villa manager Remi Garde chuan, "Goal khat chauh khung mah ila hun ṭha vawi tam tak kan insiam theih avang khan ka lawm. Kan inthlahdah lo a, goal kan neih hnuah pawh a dang khung belh tuma kan beih vangin kan hlauhawm reng tho. Kan vanneih ni a inher chhuak ve ta," a ti.

Crystal Palace manager Alan Pardew chuan, "Thil engkim mai kha a fuh lo vel vek a ni ber mai. Kan khel ṭha lo a, tun season chhunga kan khelh chhiat ber ṭum a ni hial awm e. Villa khan point thum hmuh an phu," tiin a sawi.

Pangana West Ham

Slaven Bilic enkawlna hnuaiah West Ham-in season duhawm tak an hmang mek a, khualmualah Bournemouth chu 3-1 a hnehin league table-ah pangana dinhmunah an inhlangkai.

Vitality Stadium-a inkhelah Bournemouth tan midfielder Harry Arter chuan minute 17-naah an hmahruaina goal chu yard 25 a hla aṭangin a khung.

Mahse, West Ham tan Dimitri Payet-a'n free kick aṭangin goal ropui a khung a, minute 67-naah an si phurh a sut. Forward Enner Valencia chuan minute 74 leh 84-naah goal a khung zui bawk.

West Ham hian Bourne-mouth an hneh leh tak avangin inelna hrang hrangah match riat chhung hnehloh nei loin an kal tluang a, a zawna match li chhung an khingpui te nen an inhnehtawk hnuah a zawn vekin match li chhung hnehna an chang thei a ni.

Tun season league match 21 khelh tawh aṭangin Hammers hian point 35 an hmu tawh a, inkhel dangah Manchester United leh Newcastle-te an inhnehtawk avangin table-ah pangana dinhmun an luah.

Carroll a hliam

West Ham striker Andy Carroll chu minute 15-na lekah malpui na vangin lakchhuah a ngai, a club tan a match hnuhnung palia goal hnih khung thei striker a inhliam leh ta hi Hammers tan chanchin lawmawm lo a ni.

Newcastle player hlui Carroll hian kum 2013 June thla khan Liverpool aṭangin pound maktaduai 15-in (club record fee) West Ham a zawm. A khupna vanga thla sarih a chawlh hnuah nikum September thla khan khelmual chhungah a lo kir leh a, a khel
ṭha dawn chauh tihah a hliam leh ta a ni.

West Ham manager Bilic chuan, "Carroll inhliam kha a ngaihna kan hre lo tlang hle, player te an hah lutuk loh nan training pawh kan bei nep deuh. Tuna kan tih theih awmchhun chu rei tak a chawlh ngai lo hram se tih hi a ni," a ti.

Bournemouth manager Eddie Howe chuan, "Kan khelh ṭhat ber ṭum a ni lo tih chu a chiang. Free-kick kha inkhel hmel ti danglamtu chu a ni. West Ham khan point hmuh an phu zawk a, insiam ṭhat nghal kan tum ang," tiin a sawi.