Europe-a kir duh Pato

AC Milan striker hlui Alexandre Pato chuan Europe-a kir leh a duh niin an sawi a, mahse khawvela rawlthar beiseiawm ber pawl ni ṭhin hian Europe club lian zingah duhtu a hmu zo meuh lo.

Pato hian kum 2007 khan kum 18 leka upa nichungin Brazilian club Internacional aṭangin AC Milan a zawm a, Italian club-ah hian kum nga a cham chhungin match 150 khelin goal 63 a khung.

Kum 26-a upa striker hian Milan a chhuahsan hnuah Corinthians a zawm leh a, Brazilian club tan hian match 62 a inlanah goal 17 a khung a, Sao Paulo lamah loan-a kal lehin match 95-ah goal 38 a khung. Corinthians-a a contract neih lai hi December hian a tawp tawh dawn a ni.

Brazil tan vawi 27 a inlana goal sawm khungtu striker chuan, "Europe-ah hian ka chanchin a thara ziah leh ka duh a, sulhnu chhinchhiah tlak hnutchhiah ka duh a ni. Suangtuahna ropui tak ka nei a, thawnthu thar ropui tak ziah ka duh a ni," a ti.

Pato hi Manchester United, Chelsea, Totten-ham leh Liverpool te nen sawizawm a ni. Mahse, Liverpool manager Klopp chuan Pato hi an rim loh thu leh an mamawh loh thu a sawichiang tawh. Pato nena sawizawm zingah Paris St Germain chuan Brazilian striker hi an duh lo nia sawi a ni bawk.

Brazilian striker hi Brazil coach hlui Van-derlei Luxemburgo-a enkawl Chinese club Tianjin Songjiang chuan euro maktaduai 20 a lakluh tumin an lo dawr ve bawk a, Corinthians lamin pawm mah se Pato hian China lam pan hi a duh lo nia sawi a ni.