Rooney ropui zanah United an ngui

St James Park-ah Manches-ter United captain Wayne Rooney-a'n goal hnih a khung bakah Jesse Lingard-a khung tur siam sak bawk mah se Newcastle-in khawtual tlangval Paul Dummett hmangin minute 90-naah an siphurh an sut zo. Goal ruk luhna inkhelah Red Devils leh Newcastle ten point khat ve ve an insem a, chak thei tura ding hman Louis van Gaal-a hoten ngui takin khualmual an chhuahsan.

Manchester United-in match 21 an khelh tawh aṭangin point 34 an hmu a, nizana Liverpool nena inkhel league hmahruaitu Arsenal aiin point riatin an hmu tlem a, an inthlauhna hi point 11-ah a pung chho thei bawk. League table-a 14-naa awm mek Chelsea-in West Brom an hneh chuan Red Devils nena an inthlauhna hi point riat chauh a ni tawh bawk ang.

Goal ruk

Record thlir letin Man-chester United leh Newcastle inkhelah goal a luh tam a rin-awm loh a, inkhel hmuh-nawm tak beisei ngam a ni lo bawk.

Amaherawhchu Thawh-lehni zan inkhelah team pa-hnihin attacking football an khel a, inkhel hmuhnawm tak an lantir. Minute 9-na lekah Marouane Fellaini ball tauh chuan Chancel Mbemba kut a fuh a, an penalty hmuh chu Rooney-a'n chiang takin a pet lut.

United captain Rooney a chefuh zel a, a pass mawi zet chu Jesse Lingard-a'n a khung. Mualneitu Newcastle tan inkhelh ṭan hmaa an player thar Henri Saivet leh Jonjo Shelvey an phochhuah hnuah lawmna tur awm lawk lo mah se Georginio Wijnaldum-a'n first half tawp hma minute thum la awmin kawh zetin a pet lut a, Newcastle tan beiseina thar a rawn siam bawk.

Second half-ah Dutch winger Wijnaldum goal khung tur siamsaktu Aleksandar Mitrovic-a'n minute 67-naah United defender Chris Smalling lakah penalty a hlawh chhuak a, a pet goal nghal bawk.

United-in chak tumin an khel chhunzawm a, Rooney-a'n minute 79-naah player nazawng khung thei loh khungin Van Gaal hoten chak mai turah an inngai hman. Amaherawchu Newcastle defender Dummett-a'n Rooney goal khung aia kawhin minute 90-naah a pet lut a, 3-3 in inkhel a tawp.

Eng nge an sawi?

Newcastle United boss Steve McClaren chuan, "Mipui min ṭawiawmna kha a ropui a, kan tum ber chu kan theihna hmuhtir a ni. Mi tam tak chuan United khel a hmuhnawm loh thu leh kan huaisen tawk loh thu an sawi a, mah se a tawp thlengin goal khung tumin kan bei a, kan goal khung kha chakna goal ang maia hlu a ni. Kan inkhelh hma khan 0-0 result an beisei a, result chu 3-3 a ni. Ṭan lam nei lo tan football hmuhnawm a ni a, manager tan thinphu a rang duh hle," tiin an inkhel chungchang a sawifiah thiam hle.

Manchester United boss Louis van Gaal chuan, "Chak lo ang mai kan ni. Kan kuta awm tawh kha kan thlauh leh a ni. Referee khan penalty ni miah lo tur a pe a, Smalling leh Mitrovic te khan ball an inchuh mai a ni. Eng pawh ni se awlsam taka goal ruk khung theihna tur hun ṭha kan nei a, kan hmang ṭangkai lo. Khung mai ilang chuan a zawnin vawi ruk kan chak ang a, phur takin Liverpool kan hmachhawn thei ang," tiin a sawi.

Dutch manager hian an chak loh chhanah player-te a puh a, a bik takin second half-a chance ṭha hlahtu Fellaini leh Lingard te chu mawhphurtua a ngaihthu a sawi bawk.

Newcastle hian Inrinni zan-ah St James Park-ah West Ham an mikhual ang a, United-in Pathianni hian Anfield-ah Liver-pool an hmachhawn bawk ang.

Penalty Record

Wayne Rooney-a'n Premier League-a a penalty vawi 19-na a khung a, Ruud van Nistel-rooy record penalty vawi 18 khumin Manchester United player zinga Premier League-a penalty khung tam ber a ni.