Liverpool-in Caulker an la lut

Tun hnaia defender inhliam ngah vanga buai mek Liverpool chuan Queen Park Rangers central defender Steven Caulker chu season tawp thleng an hnena cham turin loan-in an la lut. Kum 24-a upa defender hian Southampton-ah loan-in a hun hmang mek mah se Liverpool a pan theih nan St. Mary's Stadium lama a cham hun chhung hi an ti tawi.

Liverpool central defen-der zingah Kolo Toure leh Mamadou Sakho-te chu an hliam dam tawh mah se Martin Skrtel leh Dejan Lovren-te erawh hliam vangin an la chawl mek a, Reds hian Caulker hi an buai zualpui tihreh nan an la lut ta a ni. Merseyside club hian Aston Villa-a loan-a hun hmang mek an defender Tiago Ilori chu an ko kir leh tawh bawk.

Reds manager Jurgen Klopp chuan Caulker an la lut chu club tan an buaina chinfel dan ṭha ber a nih thu sawiin, "Rang taka ball inpe kuala kan khingpuite nawr hi kan duhdan a ni a, chutianga kan khelh chuan kan khingpuiten long ball an khelh a ngai ṭhin. Kan khingpuiten ball kang an uar chuan defender zingah ball tauh chhuak thei tur kan mamawh a, Caulker hi kan mamawh chhanna chu a ni," a ti.

Saints boss Ronald Koeman chuan, "Steven hi Virgil van Dijk kan lakluh hmaa kan hnena lokal kha a ni a, inven nana kan lakluh a nih avangin hmun pawh a chang tam tawk lo. A tana Liverpool zawmna hun
ṭha hi tihbuai ka duh lo a ni, " tiin loan laklawha Caulker chhuahtir an phal chhan a sawi.