Bengaluru FC-in Aizawl an thleng
Mizoram chhunga I League match hmasa ber khel turin nimin khan Bengaluru FC player-te chuan Aizawl an rawn thleng. 2014 champion team-ah hian India captain Sunil Chettri, 2015 AIFF player of the year Eugeneson Lyngdoh bakah Mizo pali Beikhokhei, Lalchhuanmawia, Lal-thuammawia Ralte leh Malsawmzuala te an tel.
India ram club zinga kalphung mumal bera an sawi Bengaluru hi tun season-ah champion rinkai an ni a, an match hmasa berah Salgaocar chu Tilak Maidan Stadium, Goa-ah 2-1 in an hneh.
Bengaluru media manager Kunaal Majgaon-kar chuan, "I League season tharah Aizawl FC leh DSK Shivajians te hi team thar an ni. Aizawl FC bik hi an player-te leh coach-te hi kan la hriat ngai loh an nih deuh vek avangin rin thiam an harsa a, Mohun Bagan nena an inkhelh ṭum video pawh kan zir uluk khawp mai. Anmahni kan la hriat chian loh bakah Northeast-a inkhelh hi zinna tur a thui avangin a awlsam ngai lo a, chuvangin Mizorama kan match hmasa ber hi kan ngai thu tak khawp mai," tiin an inkhelh tur chu a awlsam loh tur thu a sawi.
Team pumpuiin inkhelh an châk tawh thu sawi zuiin Kunaal chuan, "Assistant coach Pradyum Reddy-a'n Mizoram a tlawh tawh a, a thusawi zarah midang pawhin rawn kal hi kan châk a ni. Captain Sunil Chettri pawhin Aizawl FC nena inkhelh hun hi a nghakhlel a, ticket an hralh zo hma tih kan hriat phei kha chuan minti phur leh zual," tiin Vanglaini palai a hrilh.
Assistant coach Pra-dyum Reddy hian kum 2011 khan Shillong Lajong chu Lammualah I Day Football nomawi a lo chawi pui tawh. Vawiin hian Bengaluru coach Ashley Westwood-a'n Aizawl a rawn thleng ang.
Bengaluru-ah hian player hmuh châkawm an tam a, chung zinga langsar chu Chhetri leh Eugeneson te hi an ni. India captain Chhetri hi 2015 SAFF Championship-ah best player a ni a, ram tan goal 50 a khung tawh bawk. Khasi tlangval Eugeneson hi season liam ta khan Bengaluru FC Fan's Player of the Year, Bengaluru FC Player's Player of the Year, Football Player Association of India (FPAI) Player of the Year, AIFF Player of the Year leh I-League Mid-fielder of the Year-ah te thlan a ni.