Kompany a lo kir har dawn

Manchester City manager Manuel Pellegrini chuan an club captain hliam vanga chawl mek Vincent Kompany chu season tawp lamah chauh a dam hman a beisei thu a sawi.

Kum 29-a upa Kompany hian September 15-a Juventus nen an inhmachhawn ṭumin a chawnah hliam a tuar a, December 26-ah Sunderland an hneh ṭumin lo kir leh mah se hliam vang bawkin lak chhuah a ngai leh a ni.

Chilean manager Pellegrini chuan, "Tun dinhmunah chuan Kompany dinhmun hi sawi thiam a harsa hle a, ka ngaihdan chuan a hliam hi hun eng emaw chen chhung chu enkawl a la ngai ang," a ti.

Belgium captain ni bawk Kompany hi tun season-ah a hmel a inlan thei tawh lo a nih phei chuan Euro 2016-ah a tan inlan a beiseiawm kher lo ang.

City defender zingah Kompany bakah centre-back Eliaquim Mangala a inhliam bawk a, mah se City manager Pellegrini chuan player lakluh an tum chuang lo niin a sawi.

Season tawpa Etihad Stadium chhuahsan tur anga an sawi manager chuan, "Central defensive position-a khel thei Martin Demichelis, Nicolas Otamendi leh Bacary Sagna-te kan nei a, pre-season match-a inlan rawlthar Cameron Humphreys kan neih bawk avangin player thar kan mamawh lo," a ti.

Pellegrini chuan, "Kompany la inhliam rei deuh dawn mah se Mangala a lo kir leh ṭep tawh a, inthlak danglam kan mamawhin ka hre lo a ni," tiin player thar an mamawh loh thu a sawi.