Toure vangin Aubameyang a lawm lo

Borussia Dortmund forward Pierre-Emerick Aubameyang chuan CAF Player of the Year-a thlan a nih vanga Yaya Toure ṭawng chhuah dan chu a hriatthiam loh thu a sawi chhuak.

Africa rama football thiam ber thlannah Yaya Toure hian Aubameyang hi a phak lo a, chawimawina sem zawh a nih hnuah CAF Player of the Year chawimawina an kalpui dan chu Africa khawmualpui tana hlutna nei lo leh awmze nei lo a nih thu a sawi.

Toure hian kum 2015 Africa Cup of Nations-ah a captain-na hnuaiah Ivory Coast a champion pui a, Africa rama player che ṭha aia hmun danga che ṭha Aubameyang thlan a ni zawk hi a ngaithiam lo.

Tun season-a Dortmund tana inelna hrang hranga goal 27 khung tawhtu Aubameyang chuan, "Toure khan khang thu zawng zawng kha engvanga sawi nge a nih ka hre lo. Mahse, Toure ṭawngkam vang hian thinrim ka tum lo a, ka tan chuan hun kal tawha thil thleng satliah ang a ni," tiin Toure kamchhuak vanga a buai loh thu a sawi.