Entrepre-neurship tehfung zirchianna

Entrepreneurship tehfung zir chianna ‘Mapping of General Enterprising Tendency Among Mizo Youth’ tih chu nimin khan LESDE minister Lalchhandama Ralte-in Planning conference hall-ah a tlangzarh.

Lalchhandama Ralte chuan, zir chianna chu Mizoram hma­sawnna rahbi atan tehfung pawimawh a ni thei tih sawiin, "A bik takin zirna policy thar National Education Policy (NEP) hnuaia ruahmanna siam zel turah pawh a ṭangkai dawn. He zirchianna aṭanga Mizo ṭhalaite GET score 30.37 hian Mizote hi entrepreneurship lamah theihna kan nei sang a ni tih a tichiang a ni," a ti.

Zir chianna buaipuitu MZU Incubation Centre director Dr Laldinliana Varte leh research associate KC Malsawmtluangi te chuan, sumdawng leh entre­preneur danglamna te, GET tehfungte leh an zir chiannaa an hmuh chhuahte an sawifiah. Zir chiannaah hian district hrang hranga zirlai 2,255 (HSS zirlai 1,240 leh college zirlai 1,015)-te hman a ni a, chu'ng zinga 48.2% chu mipa niin, 51.8% chu hmeichhia an ni. Mean enterprising tendency-a mipate score chu 30.7010 a ni a, hmeichhiate score chu 30.0497 a ni thung a, chawhrualin, Mizo ṭhalaite score chu 30.37 a ni. China ṭhalaite score chu 33.3 a ni a, USA-a ṭhalaite score chu 31.9223 a ni tih an tarlang tel bawk.