Chelsea hmalam panna kawng daltu West Brom

Premier League champion lai Chelsea-in result ṭha neih duhin Jose Mourinho an ban a, beiseina sang tak nena an thlir Dutch manager Guus Hiddink-a'n result ṭha a thlen lo.

Nilaini zan inkhelah Chelsea leh West Brom te chu 2-2 in an inhnehtawk. Stamford Bridge-ah hian Blues tan Cesar Azpilicueta-a'n goal a khung a, first half-ah vek Craig Gardner-a'n West Brom tan a chhang let. Second half-ah Gareth McAuley-a'n an lama a tih luh zarah Chelsea-in a vawi hnih nan hma an hruai a, Blues hi an chak mai dawna a lan tawh hnuah James McClean-a'n minute 86-naah West Brom tan a pet goal a, table chanve hnuai lama awm team pahnih an inhnehtawk.

Hiddink-a zuih?

Dutch manager Guus Hiddink hi coach lar a ni a, tunhnaia a sulhnu erawh a chhuanawm loh. Chelsea a enkawl hma hian Netherlands a kaihruai a, Euro 2016 qualifier-a an result chhiat lai takin a chhuahsan. Football thiam ram tiha sawi ṭhin Netherlands-in Danny Blind-a kaihhruaina hnuaiah Europe inelna sang ber an thleng zo lo, Hiddink hi mawhphurtu zinga mi a ni.

Premier League-ah erawh Dutch manager hian Jose Mou-rinho hnuaia fuh tawh lo chu siam-ṭhat a tum a, match nga a enkawl tawh chinah chuan a hlawhchhamah a ngaih theih. Chelsea-in Hiddink-a hnuaiah FA Cup-a League One table hnuai lama awm Scunthorpe United leh league match-a Crystal Palace an hneh tih lo chu chak an la nei lo a, chak loh pawh an nei chuang lo. Dutch manager hnuaiah West Brom an inhnehtawkpui hi draw result vawi thum an neihna chiah a ni.

Thlirna tawi

Chelsea an champion khan an innghahna chu tlarhnung phui ṭha a ni a, goal khung tam lamah erawh pahnihna Manchester City an tluk lo. Blues hian defence laiah John Terry leh Kurt Zouma te an dah thei a, chumi thlawp tur chuan goalkeeper 6ft 6in-a sang Thibaut Courtois nei mah se inrintawkna an nei lo a, hun tawp thlengin an talbuai.

Nipui transfer tawp lama an lakluh pound maktaduai 19 man Pedro lah a chefuh thei lo a, Barcelona player hlui hian first half bak a khel lo a, second half-ah kum 19-a upa Kenedy a lut. Chelsea player zinga Dutch manager hnuaia hmasawn ber chu Diego Costa a ni a, a match hnuhnung pathuma goal li khungtu Spanish forward hian goal khung lo mah se West Brom defender-te a tibuai hneh hle.

Eng nge an sawi?

Chelsea boss Guus Hiddink chuan, "West Brom player-te kha an huaisen a, an tluk tawh hnuah pawh thawh leh duhna rilru an nei a ni," tiin a khingpuite a fak.

West Brom manager Tony Pulis chuan, "Kan result-ah kan lawm. Inkhel harsa tak a ni a, thawhrimna hmangin vanneihna kan zawng a, kan duh kan hmu," tiin a sawi.

Chelsea-in Inrinni zanah Stamford Bridge-ah Everton an mikhual dawn a, tunah hian vawi 21 khelhah point 24 hmuin 14-naah an awm mek a, relegation zone-a awm Sunderland aiin point ruk chiahin an sang zawk.