Sunderland hmalam a êng ṭan

Dutch manager Dick Advocaat hnuaia season bul ṭan ṭha lo Sunderland-in manager Sam Allardyce kai-hruainain relegation zone an chhuahsan hnai a, Nilaini zan khan Jermain Defoe hattrick hmangin Swansea 4-2 in an hneh. Black Cats hian point 18 hmuin 18-naah an awm a, an chung chiaha awm Swansea an phak lohna chu point khat chiah a ni tawh.

Liberty Stadium-ah keeper Lukasz Fabians tihsual zarah Defoe-a'n minute thumna lekah Sunderland tan a khung a, Swansea-in Gylfi Sigurdsson hmangin an sut. Swansea defender Kyle Naughton chu sawisel theih takin hnawhchhuah a ni a, hemi hnu hian Swans hian Andre Ayew hmangin hma hruai bawk mah se second half-ah an tlem zawkna a lang.

Mikhual team-in Patrick van Aanholt hmangin an siphurh an sut a, goal hmahruai khungtu Defoe-a'n hmahruaina goal leh chak nemnghehna goal a khung leh bawk.

Inkhel dangah Stoke City-in Britannia Stadium-ah Norwich chu 3-1 in a hneh a, chak chiang ang lang mah se chak hrama ngaih theih an ni. Minute 31-naah Norwich midfielder Gary O'Neil chu hnawhchhuah a ni a, Stoke hian Jon Walters hmangin minute 49-naah hma an hruai chauh. Norwich-in an siphurh Jonny Howson hmangin sut leh thuai mah se player pakhat tam zawk Stoke tan Joselu leh Ryan Bennett te'n goal khung lehin 3-1 in mualneitu an chak.

St Mary's Stadium-ah Southampton-in Shane Long leh Dusan Tadic te goal hmangin harsatna nei loin Watford 2-0 in an hneh. Saints hi chak chiang mah se tun season-ah erawh beisei an pha bik lo, league match hnuhnung pakuaa an vawi hnih chakna chiah a ni.