Arsenal leh Liverpool an inhnehtawk

Arsenal chuan Premier League table chung bera insawhngheh theihna hun ṭha an neih an bawhpelh a, Nilaini zan khan Anfield-ah Liverpool nen 3-3 in an inhehtawk. Gunners hian match 21 aṭanga point 43 hmuin hmahruaitu la ni mah se pahnihna Leicester City aia an chungnun na chu goal difference chauh a ni tawh.

Inkhel dangah Manchester City chuan an mikhual Everton chu goal awm loa an inhnehtawkpui avangin point 40 hmuin table-ah pathumna an nih chhunzawm a; Tottenham chu an mikhual Leicester City lakah sikhat faia an tlawm avangin point 36 hmuin palina an ni.

Anfield-ah chuan

Jurgen Klopp-a nauten an khelmuala inkhel an ni tih an hria a,
ṭan phat aṭangin an zam lo tih a lang. Brazilian forward Roberto Firmino hmangin minute 10-na lekah hma an hruai nghal. Reds fan te au thawm a reh hmain Arsenal tan Aaron Ramsey-a'n an si phurh a sut ve nghal.

League match sarih chhung goal khung tawh lo Brazil star Firmino-a'n goal khat a duh tawk lo. Minute 19-naah a team te hma a hruai pui leh. Mahse, Gunners striker Olivier Giroud kan hmu zui zat a, ani hian minute 25-naah goal khungin 2-2 a ni nghal der.

Liverpool goal chhuah pahnih hi an tlarhnung khawng tawk loh vangah a ngaih theih. Premier League chanchinah team pahnih te Anfield-a an intawn ṭuma ṭan aṭanga minute 25 chunga goal li a luhna hmasa ber a ni.

Second half-ah Arsenal game a nung thar a, an goal hnihna khungtu Giroud chuan box chhungah ball rang taka vir puiin an goal thumna a khung. French striker hian tun season-ah a club tan inelna hrang hrangah goal 18 a khung tling a, a goal khung hi an chak pui ngei tura ngaih a ni hman.

Amaherawhchu, beidawng ngai lo Liverpool-in tlawm an tum lo. An goal phurh sut tumin na takin an nawr let a, substitute Joe Allen chuan minute 90-naah an si phurh a sut a, goal dang a lut tawh lo. Reds lamin an phu ang ngein point an sual chhuak a, Arsenal lamin point thum hmu ngei tura an inngaih laiin point hnih an hloh thung.

Eng nge an sawi?

Liverpool manager Klopp chuan, "Inkhel bul kan ṭan ṭha a, kan theihna a san zia pawh kan pholang. Harsa takin goal hnih kan sual chhuak a, rilru kan pek tawk loh vangin holam ang reng takin goal hnih kan chhuah leh thung. Kan khelh danah khan lawmna tur tam tak a awm rualin insiamṭhatna lai tur kan la ngah hle," a ti.

Arsenal manager Arsene Wen-ger chuan, "Liverpool chuan second hnu-hnung ber a rik thlengin min bei let ṭhin a, chu chu kan hmu nawn leh ta. Point thum hmu thei kan nih laia point kan hloh ṭhen khan min ti lawm lo a, 3-2 a nih lai khan goal khung belh theihna hun kan neih kan chhawr ṭangkai lo. Mahse, ka naute inpekna leh thawhrimna erawh ka hmuh hmaih lo," tiin a sawi.

Hmabak

Team pahnih hian Pathianni zanah inkhel hautak an hmachhawn zui ve ve dawn. Liver-pool an hahchawl hman dawn lo a, Manchester United an mikhual zui dawn. Arsenal hmabak pawh a awlsam bik lo. League match an khelh hnuhnung vawi ngaa hnehna an chan zawh lohna hmun Stoke City khelmualah an leng lut dawn a ni.

Leicester an tlo

Season ṭan dawn khan Leicester City hi table mawngphaha talbuai tura ngaih an ni. Mahse, rin angin thil a kal lo. Foxes hian minute 83-a Robert Huth-a tauh luh hmangin Tottenham chu White Hart Lane-ah 1-0 in an hneh.

Spurs tan Harry Kane-a'n goal khung theihna ṭha a hmu a, mahse keeper Kasper Schmeichel a paltlang zo lo. Spurs hian an khelmuala league match an khelh hnuhnung paliah vawi khat chiah hnehna an chang thei.

Foxes striker Jamie Vardy chu a ṭhâl na vanga a chawlh reng hnuah inkhel turin a lo kir leh tawh a, goal khung lo mah se a club tan a dam leh ta hi chanchin lawmawm a ni.

Team pahnihte hi tun hnai ni 10 chhungin vawi thum an inhmachhawn dawn a, Janaury 10 khan FA Cup third round-ah 2-2 in an inhnehtawk tawh a, January 21 khian fourth round lut tur zawk chingfel turin an inhmachhawn leh bawk ang.

Leicester boss Claudio Ranieri chuan, "Hnehna chan kan duh a, harsa taka point thum kan hlawh chhuak thei hi ka lawm hle. Match thum chhung goal kan chhuah lo zawn tawh a, lawmna tur hlir a ni. Mahse tunah hian May thla ni loin January thla chauh a la nih avangin kawng thui tak zawh tur kan la nei a, kan dawhtheih a ngai dawn hle," a ti.

Italian manager Ranieri hian 1999-2000 khan Spanish club Atletico Madrid a lo enkawl tawh a, hetih lai hian Spurs manager Mauricio Pochettino hi player atan lakluh a lo tum tawh a ni.

Goal khung lo City

Premier League bikah kum 2010 November thlaa Manchester City-in an khelmuala Birmingham goal lut loa an inhehtawkpui hnua a vawi khat nan Nilaini zan khan Everton chu 0-0 in an inhnehtawkpui leh.

Manuel Pellegrini naute hian goal khung tumin vawi 22 ngawt Everton tlarhnung an rum ṭhaih. Mahse, heng zinga panga chiah hi goal zawnah a kal a, chu pawh keeper Tim Howard-a'n a dang vek.

English player manto ber Raheem Sterling chuan goal shot vawi ruk nei mah se chakna goal a khung thei lo a, striker Sergio Aguero-a'n a zia a chhuah thei lo tluan bawk.

Chelsea hel lai defender John Stones chu Sterling laka a foul avangin penalty chawi ngei tura ngaih a nih laiin referee Roger East-a'n City beiseina a ti hlawhtling lo thung.

Manchester City boss Manuel Pelle-grini chuan Stones-a foul chu penalty chiang tak a nih thu a sawi laiin Everton manager Roberto Martinez erawh chuan refree thutlukna chu a dik hlea a hriat thu a sawi thung.