Mizo player zingah Mama a thiam ber - Chhetri

India tana goal 50 khung hmasa ber Sunil Chhetri-a'n Mizo zinga a khelhpui hmasak ber chu S. Malsawmtluanga a nih thu a sawi a, Mizo zinga professional footballer hmasa ber Mama chu Mizo player a hmuh tawh zinga thiam a tih ber a nih thu Vanglaini palai a hrilh bawk.

Inrinnia Aizawl FC hma---chhawn tur Bengaluru cap-tain Chhetri chuan, "Mizo footballer-te hi inkhel ṭhin tan chuan hriat loh theih loh a ni a, India camp emaw club football emaw pawh ni se Mizo leh Manipuri player ṭha tel lohna hi a awm thei lo. Mizo zingah chuan Mama ka hre hmasa ber a, a thiam ka ti ber bawk. Amah hi player entawn tlak a ni a, hmana ka hriat ṭhin Mama hi tun thlengin a la ṭha a, kum 100 chuang a khel tawh hial ang," tiin fiamthu pahin Mama daih rei zia leh a ngaihsan zia a sawi.

India captain Chhetri chuan Aizawl FC chungchang sawi zuiin, "Nikum I League-ah Royal Wahingdoh pathumna an ni thei a, Aizawl FC hi an danglam chuangin ka ring lo. Anmahni khelmuala khel tur kan nih avangin khelh an harsa dawn a, chutihrualin chak ngei tumin kan rawn kal a, chumi tur chuan theihtawp kan chhuah ang," tiin a sawi.

Kum 31-a upa Chhetri hian SAFF Cup-a India a champion pui hnuin I League bul ṭan nan Salgaocar lamah freekick
aṭangin goal mawi tak a khung a, Aizawl FC nena an inkhelh hunah thlir bik a sual lo ang.