Arsenal pan tum lo Aubameyang

Tun hnaia Arsenal leh Barcelona nena sawi zawm hlawh mek Borussia Dortmund striker Pierre-Emerick Aubameyang chuan Signal Iduna Park chhuahsan tumna a neih loh thu a sawi.

African Footballer of the Year 2015 atana thlan Aubameyang chuan, "Dortmund-ah hian hlawhtlinna tam zawk neih ka duh a, Germany-ah hian ka hlim rih a ni. Khawiahmah kal ka tum lo. Thlaa lawn ka tum loh ang bawkin Arsenal emaw Barcelona emaw pan ka tum lo," tiin Dortmund chhuahsan a tum loh thu a sawi chhuak.

Gabon international hi tun season-ah Dortmund tan a che ṭha hle a, league match 17 a khelh tawhah goal 18 khungin kum 2020 thleng cham turin German club-ah hian contract a nei a ni.

Kum 2013-a Saint-Etienne aṭanga Dortmund pantu striker hi Arsenal chuan pound maktaduai 42 vela lakluh an huam nia sawi a ni a, mahse amah ngei a ṭawng chhuah tak avangin Gabonese striker hi Bundesliga lamah kan la hmu chhunzawm zel dawn niin a lang.