Arsenal, Leicester leh Man City inlan dawn

Tun kartawp hian Premier League champion tuma inel mek te an inlan kim dawn. Pathianni zan dar 9:45-ah hma-hruaitu Arsenal chu Stoke City khelmualah an leng lut ang a; Inrinni zan dar 8:30-ah Manchester City chuan Crystal Palace mikhualin dar 11:00-ah Villa Park-ah Leicester City an leng lut bawk ang.

Arsenal hian hun tawp dawna goal an chhuah avangin Nilaini zan khan Liverpool lakah point hnih an hloh a, manager Arsene Wenger chuan a hrilhhai thu a sawi chhuak. Hetih lai hian Stoke erawhin Norwich City lakah 3-1 in hnehna an lo chang thunga, inrintawkna an neih phah ang.

French manager Wenger chuan, "Anfield-a kan 'hrilhhai' na kha min 'fuih phurtu' atan kan hman ngei ka beisei. Ṭha takin khel mah ila minute khat lek pawh kan inthlahdah zeuh chuan chesual thei kan ni tih hriat a ngai," a ti.

Stoke khelmual Britannia Stadium hi Arsenal tan hmun nelawm a ni lo, he hmuna league match an khelh hnuhnung pasarih aṭangin vawi khat chiah hnehna an chang. Vawi li a tlawm zawkah ṭangin vawi hnih chu an inhnehtawk, an intawn hnuhnung ber December 6, 2014 khan Stoke-in 3-2 in hnehna an chang.

North London club innghana tur chu an goal khung hnem ber ni mek striker Olivier Giroud a ni dawn a, ani hian a club tan tun season-ah inelna hrang hrangah goal 18 a khung tawh. Gunners tana goal kaw khung tawhtu Alexis Sanchez a dinhmun la chiang lo mah se inlan thei dinhmunah a ding nia sawi a ni.

Hriatthiam har City

Table-a pathumna dinhmun luahtu Manchester City hian an match hnuhnung paliah vawi hnih hnehna changin vawi hnih dang chu an khingpuite nen an inhnehtawk. Zanin-a Etihad Stadium-ah team vantlang Crystal Palace an lo mikhual turah pawh hian chak chiangsa a ngaih theih an ni bik lo.

Nikum February thla hnuah a vawi khat nan City hian an khelmualah Everton chu Nilai zan khan goal awm loin an inhnehtawkpui. Hetihlai hian Palace pawh table mawngphaha mi Aston Villa lakah 1-0 in an lo tlawm ve bawk.

City hian Etihad stadium-ah hian an match hnuhnung 18 aṭanga vawi 15 hnehna an chan theih avang leh Palace hi an intawn hnuhnung vawi 10-ah vawi kua ngawt an hneh theih bawk avangin an huphurh hran lo ang.

Phur thar Villa hmah Leicester

Leicester City hian league match 21 khelh tawh aṭanga point 43 hmuin table-ah pa-hnihna dinhmun an luah. An tluk loh awmchhun chu an point hmuh ang zat tho hmu Arsenal niin goal difference chiah an danglamna a ni rih.

Zanina Leicester hma-chhawn tur Aston Villa hian Nilai zan khan Crystal Palace hnehin beiseina an neih thar ve lai tak a ni. Villa hian relegation zone chung chiaha awm Swansea chu point riatin an phak lo mek.

Villa manager Remi Garde chuan, "Kan beisei ve reng ṭhin point thum hmuh chu a thlen dik tak avangin kan lawm hle a, tunah hian kan boruak
ṭhat lai tak a ni. Kan khingpui leh tur Leicester hi team ṭha tak an ni a, mahse kan theihna zawng zawnga kan bei leh a nih chuan point kan hlawhchhuah leh theih ka beisei," tiin a sawi.