Copa del Rey Quarterfinal-ah Valencia leh Atletico an lut

Ningani zan khan Copa del Rey last-16 match hnih khelh a ni a, Valencia leh Atletico Madrid-te'n an khingpui ve ve hnehin Spanish Cup quarterfinal an lut.

Valencia-in khual-mualah Granada chu 3-0 in an hneh a, first leg-ah 4-0 a an lo sawp tawh bawk avangin inkhel pahnih belhkhawma Valencia chakna zat hi 7-0 a ni.

Gary Neville-a enkawl Valencia tan Paco Alcacer, Pablo Piatti leh Wilfried Zahibo-te'n goal khat ṭheuh an khung.

Inkhel dangah Atletico Madrid chuan Antoine Griezmann-a goal hnih thun chhawr ṭangkaiin Rayo Vallecano chu 3-0 in an hneh bawk a, inkhel hmasa nena belhkhawma an chakna zat hi 4-1 a ni.

Spanish Cup quarterfinal khel tur hian Valencia leh Atletico hma hian Barcelona, Sevilla, Athletic Bilbao, Celta Vigo, Las Palmas leh Mirandes-te an lo lut tawh.