UCL-ah Arsenal inlan leh dawn ta

Arsenal chuan European football inelna sang ber Champions League an khel ve leh dawn ta a, zanin dar 12:30 hian Group B match hmasa ber atan PSV Eindhoven an lo mikhual dawn a ni.

Mikel Arteta-a'n Premier League huangah chuan manager ṭha zinga mi a ni tih a finfiah tawh. European club dangte hmachhawn turin Spanish manager hi a ṭha tawk em, tih fiahin a awm chho leh dawn.

Arsenal ṭantute chuan hman deuha Thawhlehni leh Nilaini zanlaia rimawi an hriat ṭhin ang kha an hre leh dawn ta tihna a ni a, group stage chauh la ni mah se TV hmaah an ṭhu furin a rinawm.

A tawpna kha

Tun dinhmun sawi dawn chuan a hma lama thil thleng leh lo awm tawhte sawi lan a ngaih chang a awm. Arsenal tan Champions League hi thil thar hlak a ni bik lo, tun hma lama an lo khelh fo tawh a ni - an khelh lohna erawh a rei ta deuh.

Arsene Wenger hunlai kha a ni a, kum 2016-17 season khan Gunners hian Emirates Stadium-ah Bayern Munich an mikhual a, anmahni ṭantute pungkhawm hmaah German club lian hi 5-1 ngawtin an ngam lo.

UCL last 16-ah an zinkawng a tawp a, a dawt leh season aṭang chuan an khel phak ta lo. Wenger hnuah Unai Emery a rawn lang a, ani hnuah Arteta a rawn lang leh - tunah chuan hmana an zinkawng ngai kha an zawh leh dawn.

Rice hoin

Arsenal player zingah langsar leh kal fawr ber tia sawi tur an awm rih lo a, mahni hna chuanpual hlen ṭha ang zawnga kan teh dawn a nih erawh chuan Declan Rice hi a hming lam hmasak a ngai ngeiin a rinawm.

West Ham captain hlui hian Europa Conference League nomawi a chawi tawh ngei a, mah se UCL erawh a la khel ngai lo - a tan chauh ni loin Arsenal player tam zawk tan pawh thil thar a ni dawn.

Arsenal midfielder Rice chuan, "Tun hma aṭanga ka lo sawi fo tawh Champions League chu ka khel ve dawn ta, ka phurin ka nghakhlel hle. Arsenal tana hetiang hun remchang ka nei thei hi ka lawm takzet.

"Football zinkawng hi vawi khat bak a neih nawm theih loh a, engtik niah emaw chuan Champions League nomawi hi ka kut ngeia ka chawi ve hun a la thlen ka beisei," tiin UCL khel chauh ni loin champion ngei a duh tih a sawi.

Mithar

Champions League an khelh hnuhnung ber aṭangin kum ruk a liam tawh miau a, tuna Arsenal player-te tan chuan thil thar tia sawi theih a ni. Kai Havertz leh Gabriel Jesus te erawhin an club hlui tan UCL an lo khel tawh ṭhin.

Wenger-a hunlai khan Mohamed Elneny pawhin a lo khel tawh - mah se tun dinhmunah Elneny hi a hliam mek, ani bakah hian Thomas Partey leh Jurrien Timber te pawh hliam vangin an inlan thei dawn lo, anni hi dam se la chuan tawnhriat nei an ni.

Everton an hneh ṭuma inhliam Gabriel Martinelli dinhmun a chiang lo a, a inlan thei lo a nih pawhin Leandro Trossard a awm avangin buaina awm lo tura ngaih a ni. Bukayo Saka chuan season hmasa lam a boruak a phak lohna insiamṭhat a tum ang.

Fabio Vieira nge Havertz zawk khel tur hriatthiam a harsa, an tawnhriat neih tawh dan ngaihtuah chuan Germany international Havertz zawkin bul a ṭan a rinawm. Ani hi Chelsea tan UCL final-a chakna goal awmchhun khung tawhtu a ni.

PSV an ṭha

Champions League an khelh tawh chinah PSV thlen san ber chu kum 2005 kha niin semifinal an thleng, an la champion bik lo tihna a ni. Tun hnaiah Peter Bosz-a enkawl team hi an khel ṭha tluang hle, inelna hrang hranga an match 26-ah an tlawm lo.

Kartawp Eredivisie inkhelah NEC 4-0 in an hneh a, league match vawi li an khelh tawhah chak fai vekin Dutch league hmahruaitu an ni - khelh dan phung nghet ṭha tak nei an nih avangin Arsenal tan basa ngam ngawt chi an ni dawn lo tih hriat a ngai.

PSV hian UCL playoff-ah Rangers an paltlang, Scottish club nen hian first leg-ah 2-2 in an inhnehtawk. Coach Bosz-a'n hma an sawn tur thu a sawi a, an intawn leh meuh chuan 5-1 in an sawp a, belhkhawmah 7-3 in an chak.

Group satge khel tura an tlin hnuah PSV coach Bosz hian a hma aia hma an sawn nasat a ngaih tur thu a sawi leh a, tunah Arsenal lakah an hmasawnna chu eng ang tak nge tih fiah a ni dawn - inkhel a hmuhnawm ngei ang.