Inter Village Volleyball Team 107 inelna tur tournament an ṭan

Khua leh khua, veng leh veng volleyball hmanga inelna lian JJS Trucking BharatBenz Inter Village Tournament chu Thawhṭanni zan khan Spike Off a ni a, nimin aṭang khan R. Dengṭhuama Indoor Stadium, Mualpuiah inelna neih chhunzawm nghal a ni bawk.

Ben hawnna hun hi Chanmari YMA Hall-ah hman niin, Mizoram Co-operative Alex Bank chairman Lalnunsanga'n a spike off a, Mizoram Volleyball Association (MVA) president Dr. Lalmalsawma Nghaka chuan fixture a tlangzarh thung.

Pro Volleyball League khelh zawh taka Thutak Nunpuitute Team (TNT) champion puite Vanlalṭanchhana (Valbuanga) kaihhruainain thutiam lakna hun hman niin, mipa team 80 leh hmeichhe team 27 aiawhten thu an tiam.

MVA hian Inter Village Tournament hi a lo buatsaih zauh zauh tawh, inelna neih hnuhnung ber kum 2019 kha chuan mipa team 52 leh hmeichhe team 18 an inlan a, kuminah erawh team tel zat hi nasa takin an pung a, an tam ber ṭum a la ni hial.

Ruahman dan chuan September 29, Zirtawpniah a hmawr bawk a ni dawn. Hmeichhe inelna bik hi September 22 aṭanga khelh ṭan tur niin, a hmawr bawk hun erawh mipa nen a inang dawn a ni.

Vawiin inkhel tur zingah champion lai Maubawk an tel dawn. Maubawk hian 2019 final-ah khan Hunthar an hneh a, kumin an match hmasa ber atan nimina Chekawn hnehtu Thingdawl an hmachhawn ang.