Zaninah ngaihven hlawh : Bayern Vs Munich

Zanin dar 12:30 hian Bayern Munich-in Allianz Arena-ah Manchester United an mikhual dawn a, Bavarians hi Erik Ten Hag-a mangchhia belhchhah theitu an nih rualin beiseina kawl êng ṭan hun a ni thei bawk.

Champions League group B-ah Bayern leh Man United te hi Copenhagen leh Galatasary te nen an awmho a, zanin hian eng result pawh thleng se German club leh English club te group stage paltlang thei tura rinkai ve ve an ni.

United hmaah Kane

Manchester United-in no. 9 an mamawh a, hetihlai hian Premier League-a a ṭhatzia nemnghet tawhtu Harry Kane-a'n nomawi duha Tottenham chhuahsan a duh thu a tichiang tawh.

Amaherawhchu, Man United hian Sir Alex Ferguson-a awm loh hnuah nipui leh thlasik bazarah thutlukna mak deuh hlek an siam fo a, England captain la lut tura si ruk laa an thawhchhuah an rin ṭhup laiin Tottenham dawr an tum lo.

Spurs chairman Daniel Levy hmin a harsat dawn bakah Kane a hlawh tur zawng zawng nen Man United hian an tlin loah an inngai. United-in Kane an dawr tak loah chuan anmahni ang bawka no. 9 mamawh Bayern-in si ruk lain an el ta thung a, Bavarians erawhin Robert Lewandowski thlak zo turah ngaiin sum pawh an theh chhuak tam ngam hle.

Bayern hian euro maktaduai 100 (£86.4m) in Kane hi an lalut a, a chet ṭhat dan a zirin a man hi a la pung thei. Kane hi Bayern history-a player manto ber a ni a, kum 2019-a Atletico Madrid aṭanga Bayern pantu Lucas Hernandez (€80m) man a khum a ni.

Kane hi DFL Supercup-ah a inlan nghal a, RB Leipzig lakah chak zo lo mah se Bundesliga-ah erawh goal nen bul a ṭan a, league match liah goal li a khung der tawh. English striker hi a khelhpuiten no. 9 atan an pawm thlap a, club-ah pawh a tla tlum hle.

English striker Kane hian Man United lakah Premier League-ah goal nga a khung tawh a, assist vawi thum a nei tawh bawk. Kane hian Man United tlarhnung tan mangchhia a thlen tawh ṭhin a, zaninah pawh England captain hi en bik tur a ni ang.

Bayern belchiang ang

Bayern Munich hi hun rei tak German football thununtu an ni a, chutihrualin tun hnaiah an tlahniam hret. Season liam ta khan Bundesliga-ah Borussia Dortmund chetsual vangin an champion hram a, an match hnuhnung berah Bayer Leverkusen nen an inhnehtawk.

Bavarians hian Kane nei tawh mah se Thomas Tuchel hnuaiah game nghet an la nei thei lo a, league match vawi li an khelh tawhah vawi thum chak mah se vawi khat chiah clean sheet an la nei. Inhliam vangin Manuel Neuer a la khel thei lo a, Bayern tlarhnung hi season liam ta ang tho khan a la phui lo.

Player thar zingah Napoli aṭanga an lakluh South Korean centre back Kim Min-jae-a'n tlarhnugah hmun nget a chang chho a, Konrad Laimer erawh squad tichhahtu a ni rih. Bayer Leverkusen nena an inhnehtawk ṭumin Joshua Kimmich an thlak a, German midfielder hi a lawm zan lo niin sawi a awm bawk.

Chutihrualin tlarhnung phui bik lo Man United tan Bayern tlarhma hi chu an tawrhhlehawm hle. Kane thlawptute hi Leroy Sane, Thomas Muller, Serge Gnabry leh Jamal Musiala te an ni hlawm a, Germany-a hmun pawimawh chang pha vek an ni. United ṭantuten a êng zawnga thlir duh a nih chuan Germany-in tun hnaiah result ṭha an nei lo - an result neih ṭhat loh chhanah Bayern player-te an mawhpuh theih!

United an buai

Man United-in league match nga an khel tawh a, minute 90 chhung khelh ṭhat an la nei lo. Hnehna an channa inkhel Nottingham laka bul an ṭan dan chu chhe tawp khawk tiin a sawi theih a, Wolves an hneh danah pawh inchhuanna tur a awm lo.

David de Gea aia an lakluh Andre Onana-a'n goal a chhuah ve reng a, amah tihsual erawh a awm chiah ngai lo. Harry Maguire a khelh meuh loh avangin mimala pawi khawihtu han kawh mai tur an awm lo a, an result erawh a ṭha si lo.

Uluk lehzuala United tlarhnung bihchian chuan Raphael Varane inhliam an tuar tiin a sawi theih a, Lisandro Martinez-a'n chetsual khut a nei a, Victor Lindelof a la nem reng bawk. Nipui bazara Maguire an hralh thei lo kha an tuar a tih theih a, United hian centre back an tihfuh hlei thei lo.

Real Madrid aṭanga an lakluh Casemiro-a'n fak hlawh ṭhin mah se tun season-ah erawh fak theih a la ni lo a, Christian Eriksen-a'n attacking pui thei mah se tlarhnung a ti phui ṭha tawk lo. An sum senna Mason Mount a la inhliam a, player thar dang Sofyan Amrabat-a'n match fitness a la nei tawk lo. Scott McTominay chungah bawk rinna an nghah leh rih mai a ngai ang.

Tlarhma lamah Ramus Hojlund a inlan ta a, Danish striker hi match khat aṭanga teh theih ni lo mah se club ṭantute phurna tur khawp chuan a khel chhuak. Bayern laka result ṭha nei tur chuan counter attack-ah bawk an innghat a ṭul dawn a, Marcus Rashford a pawimawh dawn.

Transfer bazarah Man United hian sum an seng tam a, chutihrualin khelmual pawn lama buaina nei Antony leh Jadon Sancho te vangin squad a chhah tawk lo. Season bul ṭan ṭha lo United tan Allianz Arena-a point hlawh chhuah hrim hrim a pawimawh ang.