India roreltu Ṭhazuala

Younex-Sunrise 35th Sub-Junior (U-15 & U-17) National Championship-ah H. LalṭhAzuala a champion - Mizo zinga national badminton singles huang, masters category tih loh inelnaa champion hmasa ber a ni a, a record hi a ropui takzet.

Jwala Gutta Academy, Hyderabad-a neih inelnaah Ṭhazuala hian Telegana mi Pranauv Ram chu final ah 21-11 21-15 a hnehin a champion - Ṭhazuala hian seeded no.3 ni chungin inelna a hmachhawn a, final-a a hneh tak Pranau hi seeded no 4 a ni.

Chanmari West rawlthar chuan, "A nihna takah chuan semifinal luh pawh ka inbeisei ngam lo. Mahse, ka beisei aia ṭha result ka nei thei a, ka lawm hle. Ka hlawhtlinna bulpui ber chu Pathian a ni a, a dawtah chuan academy a ni," tiin Vanglaini a hrilh.

Pullela Gopichand Badminton Academy, Hyderabad-a badminton zir mek Ṭhazuala hi ranking tournament-ah vawi hnih a lo champion tawh a, tunah national champion a ni leh ta - ram pum huap inelnaah vawi thum a champion tawh tihna a ni.

Ranking tournament-ah hian a duh apiang tan inelna hmachhawn theih a ni a, ranking tournament-a ti ṭha, seeding nei sang te leh state aiawha thlan bikten national championship hi an khel thei - Mizo rawlthar a champion ta.

Ṭhazuala chuan, "Ka nu leh pa te min thlawpna ka hre reng a, anmahni vang liau liaua tun dinhmun hi thleng ka ni. Ka tana ṭawngṭai ṭhinte pawh ka hre reng. Tin, min chher hriamtu, ka tana coach hlu êm êm Sajitha John pawh sawi hmaih a thiang lo a, tunah ka coach ni tawh lo mah se min ngaihtuahna leh min puihna avangin hei chen hi ka kal a ni," tiin Vanglaini a hrilh.

Mizoram Badminton Association chuan thuchhuah siamin, "Hetiang level sanga champion thei Mizo player kan nei hi kan chhuang takzet a ni," an ti - he inelnaa semifinal lut chin hi 17th – 22nd October, 2023 chhunga Chengdu, China a neih tur, Badminton Asia Championship-ah India ai awh turin an tling nghal a, China-a inelna hmachhawn turin Ṭhazuala hi a inbuatsaih nghal ang.