Hripui leng karah bank-te'n Thil tam tak tih theih an nei - Lok Sabha MP

Nimin khan Lok Sabha MP C Lalrosanga hoin Serchhip District Consultative Committee/ District Level Review Committee & District Level Security Committee on Bank chu DC meeting room-ah an 

ṭhukhawm. C Lalrosanga chuan Covid-19 leng karah bank-te'n thil tam tak tih theih an neih thu a sawi. 

C Lalrosanga chuan Covid-19 avangin mi tam takin an eizawnna hna an chan a, state pawn aṭangin mi tam tak an rawn haw tih sawiin, "Hun pangngaia bungrua leh hmanrua tluang taka kan hmuh ṭhinte pawh kan hmu ṭha tawk lo. Ei leh bar zawn kawngah nasa takin min nghawng a ni. Covid-19 vanga hna chan leh eizawnna lama harsatna tawkte chhanchhuah an nih theih nan bank-ten thil tam tak in ti thei," a ti.

Bank-te chu ṭhahnemngai taka thawk tura ngenin Lok Sabha MP chuan, "Bank-te hi sorkar laipui pawhin a ngai pawimawh hle a, Ministry of Micro, Small & Medium Enterprises (MSME) kaihhnawih ruahmanna thar eng emaw zat a siam phah a ni," a ti a, Covid-19 avanga bank-te mawhphurhna a pawimawh lehzual avanga bank-te hnathawh dan thlirhonaah pawh hian tel a nih thu a sawi. 

Serchhip DC Kumar Abhishek pawhin thu sawiin, "Banking lama hmasawnna tur kan la neih - inzar zau chungchang te, Financial Literacy Campaign lamte leh bank hote himna (security) lam thilte chu tunhma aia ngai pawhmawh zual a ngai. Mizoram chu lehkhathiam tamna state a nih avangin online banking lam uar deuh deuh tura inzirtir a ṭhat  ka ring," a ti.

Meeting-a tarlan a nih danin, March 30, 2020 a Credit Deposit Ratio (bank a sum deposit aṭanga an puk chhuah tir zat ratio) chu 42.24% a ni a, Annual Credit Plan hnuaia loan puk tir zat chu 39.60% a ni. Annual Credit Plan hnuaia puk chhuah tirte hi eizawnna agriculture, industry leh services sector lama hmasawnna tur atan a ni.