Lianzuala te an tlawm

AFC Champions League-a an match hmasa berah Mumbai City chuan mikhual Nassaji Mazandaran hneh loin an tlawm a, Iranian club tana Ehsan Hosseini leh Mohammad Azadi goal khung chu a chhanletna tur an nei lo.

Mumbai tan Lallianzuala Chhangte leh Lalengmawia Ralte ten inkhel bul an ṭan a, LZ-a'n chance nei nual mah se a vanneih zan a ni lo - Mumbai hian 59% ball changin vawi 13 zet 'shot' an nei a, mahse, a pawimawh ber goal an khung miau loh avangin an tlawm.

LZ-a chuan, "A uiawm duh khawp mai. A khelhah hneh viau mah ila, a pawimawh ber goal an rawn khung avangin inrintawkna an neih phah a ni. Tin, keini lam pawhin kan chance neih kan chhawr ṭangkai tawk lo a, a pawi ka ti. Inzirna zel a ni a, a aia ṭhaa lo let kan tum ang," tiin Vanglaini a hrilh a, beisei a la bo loh thu a sawi.

Mumbai lawmna turin inkhel lehlamah Neymar, Aleksandar Mitrović leh Malcom te an inlan chungin Al Hilal chuan 1-1 in Navbahor an inhnehtawkpui thei hram.

Mumbai hian September 24-ah NorthEast United lenchilhin league match an khel zui ang a, September 28-ah Odisha lenchilh lehin, October 3-ah Uzbekistan club Navbahor chu Champions League khel turin khualmualah an lenchilh ang.