Bethlehem Vengthlangin Mission Veng an hneh

Aizawl DFA hnuaia First Division inelnaah nimin khan table-a a sang pahnih Bethlehem Vengthlang leh Mission Veng te an inkhel a, BVT 2-1 in an chak. Inkhel dangah Kanan FC-in point thum an hmu a, Kanan leh BVT hian match li aṭangin point 10 ve ve hmuin pakhatna leh pahnihna an ni.

MPL ang thoin Aizawl DFA hnuaia club-ten CRS an hmang a, tualchhung club-ten an la tlin tawk lo niin a lang. MPL10-ah Chhinga Veng chu registration fel loh avangin Mizoram Police lakah 3-0 a chak loa puan an ni.

MPL lamah Aizawl FC-in registration fel fai takin kalpui mah se an club academy lamin registration an kalpui ṭha tawk lo. CRS-a ziahluh fel tawh player pasarih an awm tling lo a, Kanan lakah 3-0 a chak loa puan an ni. Kanan tan thlan tla loa chak hi a awlsam rualin inkhel ta se goal thum aia tama chak theih dan a awm a, league tawp hunah a tuartu an ni ve thei tho bawk.

Aizawl DFA hian round thumna thlengin registration-ah hian hriatthiamna an nei a, round lina aṭangin khawng taka kalpui a nih tur thu an sawi lawk. Aizawl FA Academy hi hremna tuar hmasa ber an ni a, chutihrualin club ṭhenkhatah pawh player la fel lo an awm nual bawk.

Tukin zing dar 8:30 aṭangin inkhel a awm ṭan dawn a, chhun dar 12:30-ah Ramthar Veng FC leh FC Bethlehem te an inkhel dawn. Bethlehem hi point sarih hmu tawh an ni a, Ramthar Veng an hneh chuan Kanan leh an ṭhenawm Bethlehem Vengthlang te point hmuh zat an hmu thei ang.