Everton-in loan an la

Premier League club talbuai Everton chuan club neitu thar 777 Partners aṭangin loan an la niin khawthlang media-te chuan an tarlang a, an loan lak zan hi tarlan ni chiah lo mah se pound maktaduai 20 bawr vel niin an sawi.

Miami-a hmunpui nei investment firm 777 hian kar hmasa Zirtawpni khan Everton neitu Farhad Moshiri-a 94% stake chu lei turin inremna an neihpui a, mahse, pawl pahnih inrem avang ringawtin neitu nihna hi inhlan chhawn theih a ni lo.

Premier League, Football Association leh Financial Conduct Authority lamin club inleina hi enin, an pawm ve leh phawt a ngai a, hetianga engkim tihfel a nih hma chuan club neitu thar lam hian club thar tan sum an seng ngawt thei lo - mahse, Everton hian hmalakna sa an neih avangin 777 hian loan angin sum hi an theh chhuak phawt a ni.

777-in loan an pekchhuah hian neitu thar chingfel a nih hmaa club inrelbawlna leh Bramley-Moore Dock-a stadium thar sak meka sum hman tur chu a phuhruk thei dawn a ni.

BBC-in a tarlan dan chuan 777 hian Everton hi siam len an tum hle a, tun hnai khan club chuan Fan Advisory Board leh Shareholders Association te chu club neitu tharte chuan hun remchang a awm hmasak veleh titipuina an neih tur thu an hrilh.

Everton hian season nga chhung zet chu a zawnin sum an hloh tawh a, an stadium thar man tur hi £760mtd nia sawi a nih bawk avangin sum mamawhna a sang hle - 777 hian hnathawh tur an nei nghal nual dawn a ni.

Tun season Premier League match nga khelh tawh aṭangin Everton hian point khat chauh an la nei a, khelmual chhung leh pawnah hnathawh tur tam tak an nei. An league match hnuhnung berah Arsenal chu 1-0 in an ngam lo a, Inrinni zan dar 10:00-ah Brentford an lenchilh zui ang.