MLS-in club dang tana khel ru Miljevic an ban!
Major League Soccer chuan Montreal midfielder Matko Miljevic chu hming lem hmanga amateur club tana a khelh avangin a contract an tihtawpsak a, Montreal pawhin an player hi an hnenah a awm tawh loh thu an tichiang bawk.
Canada lama media ṭhenkhatin an tarlan danin Miljevic hi Quebec amateur league-a a ṭhianpa team tan a inlan a, match thum ngawt khelin goal ruk a khung hman. Mahse, match pakhatah player dang nen intibuaiin, a intihbuaipui player hi a hnek niin an sawi.
He thil thleng avang hian MLS lamin an league pawn lamah club dang tana a khelh thu hi an lo hria a, a ruka a khelhna Quebec Calcetto Soccer League lam hian a chet dan avangin an hrem!
MLS chuan, "Player a nih anga a intiamna awm sa chu a bawhchhia a, league hming tihliau thei zawngin a che bawk," tiin an ban tak Miljevic an ban chhan an sawifiah.
Kum 22 mi attacking midfielder Miljevic hian tun season-ah Montreal tan match riat khel tawhin, bench aṭang vekin a lut a, MLS club-ah khelhna hmun a chan tam tawk loh avangin hrehawm a ti, niin an sawi.
Bosnian-Croat thisen kai Miljevic hi Miami, Florida-a piang niin, Argentina-a piang leh seilian a nu leh pa te vangin Argentina tan international-ah a khel thei a, Bosnia & Herzegovina, Croatia leh USA tan an ko a nih chuan a inlan thei bawk!
Argentine club lar Boca Juniors leh Argentinos Juniors aṭanga inzir chhuak Miljevic hian age level lamah cuan USA Under-16 & U20 tan a khel tawh a, Argentina U18 leh U20 tan a khel tawh bawk - senior level-ah erawh international football a la khel lo.
MLS club Montreal-ah hian kum khatah $500,000 (Rs. 4,16,04,250) chuang a hlawh nia sawi a ni a, mahse, a ruka club dang tana a khelh avangin club a nei ta rih lo.