Burnley-in point an nei ve ta

Premier League match li an khelh hnuah kai thar Burnley chuan point an nei ve ta a, an mikhualna ramah Nottingham Forest nen 1-1 in an inhnehtawk - table mawngphah luahtu Luton Town chu English top flight league-a point la hmu lo awmchhun an ni mek.

Burnley hi a nihna takah chuan hnehna chang thei dinhmunah an ding hman zawk hial - Zeki Amdouni chuan minute 41-naah goal hmahruai a khung a, mahse, Forest tan Callum Hudson-Odoi chuan minute 61-naah si phurh a sut.

Hun tawp thlengin goal dang a lut lo a, team pahnihin point an insem. Hun pek belh minute linaah Burnley forward Lyle Foster chu hnawhchhuah a ni a, mahse, Forest tan a tam zawk nih chhawr turin hun a tam tawk tawh lo.

Forest hmelma Amdouni!

August 31 khan League Cup second round-ah Forest-in Burnley an mikhual a, Vincent Kompany-a team hian 1-0 in Forest an pet chhuak - he inkhela goal khungtu chu Amdouni a ni a, minute 90-naah chakna goal hi a khung.

Thawhṭanni zan inkhelah pawh Burnley-in goal an khung hmasa zawk a, goal khungtu chu Amdouni tho a ni. Nipui transfer-a Burnley zawmtu Swiss striker hian tun season-ah goal hnih a khung tawh a, Forest laka a khung ve ve a ni!

Nottingham tan League Cup aṭanga pet chhuaktu laka tlawm nawn chu thil tlawm thlak a ni a, mualphona a ni tel bawk - Burnley goal luh theih nana Luca Koleosho hnathawh hmuh hmaih a thiang lo a, kum 19 mi Italian forward hi a chanchin kan la hre dawn chauh niin a lang.

Chhantu Odoi

Goal dang lut loin chawlhlawk hman a ni a, Forest tan chak a ṭul - he team hian vanduai taka Manchester United hneh loin kar hmasa lawk khan Chelsea an hneh thung a, Burnley laka tlawm tur an ni lo.

He rilru pu chung hian Forest-in second half-ah khelmual an lut a, minute 61-naah Hudson Odoi chuan si phurh sutna goal a khung. Coach Steve Cooper-a'n chak ngei duhin tawnhriat nei ṭha Divock Origi leh Burnley striker chhuanvawr ṭhin Chris Wood te a luhtir a, goal dang erawh an beisei angin an thawk chhuak zo ta chuang lo a ni.

Burnley tan hun pek belhah lawm lohna tur a thlen belh a, South Africa forward Lyle Foster chu hnawhchhuah a ni - Yates chu ṭul lo takin a kiuin a nghawk a, referee-in inngaihtuah buai loin khelmual pawn lamah a thawn nghal.