Nadal-a'n season thara inkhelh la beisei
Rafael Nadal chuan a chawlh hun tura a ruahman tawh chu tih danglam a tum lo a, ruahman lawk tawh angin season tharah hian a tawp nan tennis khelh chhunzawm ve leh ngei chu a la tum.
Kumin January thlaa khelh zawh tak Australian Open hnuah Nadal hi a la inkhel leh lo, tun hnaiah a khel bawr hliam chu vawi hnih ngawt zai a ni a, inkhel thei loin awm rih mah se season thar erawh beiseina nen a la thlir reng.
Grand Slam vawi 22 champion tawh Nadal chuan, "A hmaa ka sawi tawh angin kum 2024 hi ka tana hun hnuhnung ber turin ka la ruahman reng, amaherawhchu ka hma hunah eng nge thleng dawn tih erawh engmah ka sawi thei lo thung.
"Inkhelh leh hrim hrim ka tum a ni mai a, a nihna takah chuan Australian Open, French Open leh inelna danga champion tuma kir tur ka ni dawn lo, chutianga champion tur chuan vawi lehkhata tih thut theih a ni lo," tiin inkhelh ve leh hrim hrim chauh a beisei tawh.
June thla khan Nadal hliam hi zai nawn a ni a, thla nga chhung chawl tura tih a ni. Harsatna dangin a tlakbuak lo a nih chuan tun season tawp hmain training chu a zawm hman tawh mai thei a ni.