Mohun Bagan an chak leh ta

I League champion Mohun Bagan-in an champion nomawi humhim turin kawng dik an zawh zel a, Inrinni tlai khan Barasat Stadium, Kolkata-a inkhelah Salgaocar FC chu 4-2 in an hneh.

An match hmasa bera Aizawl FC hneh tawhtu Mohun Bagan tan Katsumi Yusa, Cornell Glen, Luciano Sobrosa leh Balwant Singh-te'n goal khat ṭheuh an khung a, an goal khung hi first half-a lut vek a ni.

Salgaocar harh thar a tlai a, Goa club hian second half-ah Darryl Duffy leh Gurjinder Kuma hmangin goal hnih khung mah se first half-ah goal an chhuah hnem avangin awmzia a nei thui lo.

Mohun Bagan tan Mizo tlangval Jeje Lalpekhlua a inlan bawk a, Hnahthial tlangval hian Kolkata club hi a zawm tlai deuh avangin inkhel bul ṭan lo mah se second half minute 67-naah Balwant Singh thlakin khelmual chhungah a tlan lut.

Kolkata club hian league match vawi hnih an khelh tawhah chak ve vein I League-ah hma an hruai mek a, anmahni ang thoa vawi hnih chak tawh Bengaluru aiin goal difference hmangin an sang zawk.