Ropui takin David Haye a lo kir leh ta
Kum thum leh a chanve chhung boxing ring-a a hmel kan hmuh tawh loh hnuah David Haye a lo kir leh ta a, British boxer hian a la chuai lo a ni tih ring chhungah tilangin Mark de Mori chu round khatnaah a knockout.
Kum 35-a upa Haye hian an inhnek ṭan tirh aṭangin ro a rel nghal a, round khatna tawp nana second 49 chauh a awm tawh tihin a kut dinglamin a khingpui Mori hi a hnek a, Australian boxer hi nikhaw hre loa a tluk avangin Haye a chak chiang hle.
London khaw chhuak Haye hi Mori a hmachhawn hmaa a inhnek hnuhnung ber chu July 2012 daih tawh kha a ni a, Dereck Chisora a knockout. Inrinni zana a inhnek hma hian Haye hian kum nga chhungin vawi li inhnek chiah a hmachhawn a ni.
A dar hliam avanga kum 2013-a boxing a chawlhsan thu puangtu Haye chuan a tum ber chu kum 2011-a world heavyweight title Wladimir Klitschko laka a lo hloh tawh chu neih let leh a nih thu a sawi.
Vawi 29 inhnek a hmachhawna vawi 27 chak thei Haye chuan, "Kawng awlsam a ni lo a, mahse tunah chuan ka lo kir leh ta. Ring chhungah khan nuam ti tak leh hahdam takin ka khel a, khawvel heavyweight boxer zingah Mori ka hnekna kuttum kha dawng thei an awm bik lo ang," tiin a ṭawng pawr hle.
02 Arena-a mipui 16,000 punkhawmnaa an inhnek hi Haye-a khingpui De Mori-a'n inhek a hmachhawn vawi 33-na a ni a, a vawi khat tlawmna a ni bawk.
November thla khan British boxer Tyson Fury-a lakah Klitschko-a'n WBA, IBF leh WBO heavyweigth title a hloh a, boxer pahnhih hi an inhnek leh dawn. Tyson Fury hian hnehna a chang nawn a nih chuan Haye nena an inhnek theihna chance hi a sang hle.
Mahse, Fury hian Haye-a'n boxing a chawlhsan thu a puan hmaa ṭum hnih lai inhnek an tum Haye-a'n a lo ṭhulhsan tawh avangin a Bristih pui hi hmachhawn a duh loh thu a lo sawi tawh.
Haye chuan, "Tyson Fury hi inhnek thiam leh ṭha tak a ni a, min hmachhawn duh lo hi ka haw hle a ni. Mahse, min hmachhawn a chak loh chhan chu ring chhunga ka hnek dan aṭang khan in hrethiam mai ang chu," tiin Fury chu amah hlauh vanga chhuanlam zawngah a puh.