Australian Open kan nghak chhuak ta

Kumina Grand Slam tourn­ment hmasa ber tur Australian Open chu vawiin aṭangin khelh ṭan a ni dawn ta. Tun ṭum hi a vawi 104-na tur niin January 31-ah final khelh tur a ni ang.

Melbourne Park-a khelh tur he tournament hi court hrang hrang 16 a khelh tur niin heng zingah hian Rod Laver Arena, Hisense Arena leh Margaret Court Arena te chu a langsar zual an ni. Inelna hi single, double leh mixed double bakah Junior leh wheelchair player-te tan inelna buatsaih ṭhin a ni bawk.

Mipa single champion lai chu world number 1 Novak Djokovic niin ani hian nikum khan Australian Open bakah Wimbledon leh US Open title a la tel. Hmeichhe lamah pawh world number 1 Serena Williams chu champion lai a ni a, American star hian French Open leh Wimbledon title a la tel ve bawk a, anni pahnih hi nikum chhunga khawvel tennis player khel ṭha ber an ni.

Tun hma chuan

Australian Open hi Tennis Australia (TA)-in a buatsaih
ṭhin a ni a, tun hma chuan TA hi Lawn Tennis Association of Australia (LTAA) tih a ni ṭhin. Kum 1905 khan match hmasa ber chu Melbourne-a Warehouseman's Cricket Ground-ah khelh a ni.

He Grand Slam inelna hi a tirah chuan Australasian Championship tih a ni phawt a, chumi hnu kum 1972 aṭang khan Australian Championship tih niin tuna a hming 'Austra­lian Open' hi kum 1969 aṭang khan a pu ṭan.

Melbourne Park-ah hian kum 1988 aṭang khan inelna hi an nei ṭan a, kum 1905-87 inkarah kha chuan Grass Court-ah khelh ṭhin niin kum 1988-2007 chhung kha chuan Hard Court (Rebound Ace) ah khelh niin tuna an hman lai Hard Court (Plexicushion) hi kum 2008 aṭanga an hman ṭan kha a ni.

Mimal sulhnu ṭha

World number 1 pawh lo ni tawh
ṭhin Roy Stanley Emerson chu mipa single champion tam ber a ni. Australian star hi vawi ruk a champion. Pahnihna chu Djokovic niin vawi nga a champion tawh thung a, kuminah hian Emerson record nih rual theihna hun a nei dawn.

Hmeichhe inelna lamah vawi 11 ngawt champion thei world number 1 hlui Margaret Court chu tuma el phak lohin a sang fal nalh. A dawt chiahah hian Serena awmin ani hian Australian Open title hi vawi ruk a chawi tawh thung.

Kuminah hian mipa leh hmeichhiaah player 32 ve ve seeded an ni a, seeding hi ATP (Mipa) leh WTA (Hmeichhia) ranking mila siam a ni ṭhin.