Mizorama I League match hmasa ber a ropui Aizawl FC 0 - 1 Bengaluru FC
Mualpuia mipui pungkhawmin football hmuhnawm thlir an duh a, Aizawl FC leh Bengaluru FC te'n an duh ang an chhawp chhuak. Minute 90 zawhah India captain Sunil Chhetri telna Blues an vannei a, minute 26-naa Ostana Curtis goal hmangin mikhual team an chak.
I League vawi khat khelhna Aizawl FC fixtures a fuh tawk lo a, champion lai Mohun Bagan an hneh loh hnuah 2014 champion Bengaluru hmachhawn lehin match zawnin point an hlawh chhuak lo. Ashley Westwood-a hote Bengaluru erawh khualmualah a zawnin an chak a, league hmahruaitu Mohun Bagan nen an point hmuh zat a inang thung.
Yuta tel loin
Aizawl FC tana MPL4 champion-na kawnga player pawimawh Yuta Kinowaki chu Spanish coach Manuel Retamero game plan-ah awm vekin starting eleven tur ni mah se Rajiv Gandhi Stadium- inkhel turah a transfer document fel loh vangin squad-ah telh a ni lo.
Inkhelh banah Retamero chuan, "Ka thinrim takzet a ni. Yuta hman ka duh a, ka hmang thei lo. Document fel loh vangin a khel thei lo a, club hotu lamin an chhan tak an hrechiang zawk ang," tiin a sawi.
Japanese midfielder International Transfer Certificate hi tihfel a ni tawh a, Zirtawpni tlaia DSK Shivajians inkhelh hunah chuan a tel thei tawh ang.
Engtin zel?
Mohun Bagan nena an inkhelh ṭumin Aizawl FC tlarhnungah player thar Lalchhawnkima leh Emma Chigozie te an inkawp a, a fuh lo. Chhawnkima kawppui turin Spanish coach-in Lalramchullova a thlang a, a tifuh ta.
Armed Veng tlangval Chullova a khel ṭha a, Aizawl FC tlarhnung venhim kawngah leh goal khung tura an nawr thlengin MPL3 best player hi a ṭangkai. Lalruatthara'n India captain Chettri chu Mizo mipui hmaah player naranah a chhuah.
Aizawl FC khel ṭha mah se an vawi khat chesual a pawi thui a, goalkeeper Soram Poirei Anganba chuan Keegan Pereira freekick a dang per hnai hret a, Bengaluru defender bawp sei Ostano-a'n a tlawh lut chiang hle.
Tiki Taka hma bil
Aizawl FC-in midfield-ah captain David Lalrinmuana, R. Malsawmltuanga leh H. Lalbiakthanga te an hmang a, ball possession pawh 61% lai an nei. MPL champion hian ball pawh an in pass tam, vawi 372 zet ball in pe kualin chung zinga 298 chu a dik a, pass dik percentage pawh 80.1% a tling hial.
Statistics aṭanga thlirin Aizawl FC an chungnung a, Bengaluru FC-in vawi 227 chiah ball an inpe kual a, vawi 159 chauh an pass dik a, an ball in pek kual dik dan perecentage hi 70.04% chauh a ni.
Aizawl FC hi khel ṭhain ball chang tam mah se an inkhelh chhan ber 'goal' an khung thei lo.
Second half-a MPL4 best player F. Lalrinpuia leh Japanese forward Atsushi Yonezawa-te rawn lutin result an tidanglam thei lo a. Mipui ui ber erawh substitute Albert Zohmingmawia penalty area chhunga an pet hnua a tlu lo kha a ni a, Kawnpui tlangval hi tlu ta se chuan penalty pek theihna tur a ni.
Bengaluru kulhpui Thuama
Mikhual team tan Bengaluru keeper Thuama a ropui a, minute 16-naa David-a ball pet nalh tak chu goal ngei tura ngaih ni mah se Champhai tlangval hian a dang hman tlat. Hei chauh hi a ni lo, Ruatthara ball tauh ṭha zet chu Thuama hian khawih per hmanin goal ban a per a, mikhual team an him hram.
Mizo keeper bakah hian Bengaluru defence laia ding palian pahnih John Johnson leh goal khungtu Ostano te an khel ṭha a, Middlesbrough youth system chhuak Johnson hi ball kangah a ṭha hle.
Tawnhriat nei ṭha
Bengaluru-in kalphung nghet an nei a, tawnhriat an nei ṭha tih a chiang bawk. I League coach zinga ṭha bera sawi Ashley Westwood-a goal khatah a lungawi a, point thum hlutzia a hre chiang.
Second half-ah khelh dan phung dang daih rawn hmangin first half-a khel ṭha ber Manipuri winger Udanta Singh aiah Malsawmzuala a rawn luhtir. Chaltlang rawlthar Sawmtea'n Bengaluru midfield a rawn tiphui a, goal venhim kawngah a ṭangkai hle.
Eng nge an sawi?
Aizawl FC coach Manuel chuan, "Kan khel ṭha em em a, statistics khan engkim a sawi chiang a, mipuiin an mit ngeiin an hmu bawk. Point hlawhchhuah kan phu a, min ṭantu mipui pawhin result ṭha an phu a ni," tiin an phu tawk result an hmuh loh thu a sawi.
Spanish coach chuan, "Kan result hi ṭha lo mah se team ṭha lakah point kan hloh a, ka la hlauthawng lo. Amaherawhchu DSK Shivajians kan hmachhawn hunah chuan result ṭha kan neih a ṭul tawh ang," tiin a sawi a; starting eleven-a a dah luh thar captain David leh Chullova te khelh danah a lawm thu a sawi tel bawk.
Bengaluru coach Westwood chuan, "Match hnihah point ruk kan hmu a, khualmual ve ve a nih bawk avangin kan lawm hle. Champion kalkawng chu kan zawh a, nomawi chawi tur erawh chuan hmasawnna tur kan la ngah hle," tiin a sawi.
Man United academy chhuak Westwood chuan Aizawl chungchang sawiin, "Supporter an ṭha a, stadium sira tlang lang ruihte kha a mawi em em a ni. Mizoramin team ṭha tak in nei a, Aizawl FC hian an khelmualah I League club dang lakah point an hlawh chhuak nual ang," a ti.
Aizawl FC hian January 22, hian DSK Shivajians an mikhual dawn a. Bengaluru FC-in tun season-a an khelmuala an match hmasa berah January 24 hian Shillong Lajong an mikhual ve bawk ang.
A rûka Aizawl FC buaina
Aizawl FC hian keeper thar Lalawmpuia chu a ke a tihnat avangin an la chhawr thei lo. Valpuia leh Albert-te an dam chian loh vangin hun tawp dawnah chauh luhtir an ni. Yuta a khel thei lo bawk. Zirtawpniah chuan player an dam kim deuh tawh a beiseiawm.
I League Fakselna
Mizoramin a vawi khatna atan I League inkhel a thleng ta. Tun season-ah Mualpuiah inkhel dang pasarih a la awm leh dawn. Inkhel hmasa ber atangin zir tur a awm nual mai.
Fakna
• Mipui an kal ṭhahnem, football kan hlut.
• Mikhual team-te auel ve mah ila a âwm tawk kan hria, nungchang a mawi.
• Traffic management a tha a, motor parking a felfai.
• Stadium la zo fel lo mah se, an siam chin a chhung cheina a zahpuiawm lo hle.
• Mizoramah ngei I League khelh a nih theihna tura an intiamna sorkarin a tihlawhtling.
Selna
• Seat arrangement a fel lo. Ticket man to leh man tlawm an inthut pawlh.
• Rs 1,000/- man ticket lei thutna chang lo tam tak an awm, ei tur sem a mumal lo bawk.
• Stadium chhung luh hnuah thutna kawhhmuhtu an awm mumal lo.
• Ballboys-te nungchang leh chet danah hmasawn a ngai.
• Usher leh security duty zingah player-te thlalakpui leh chibai tum phêt an awm nual!
• Fans thawm a zawi. Au rual leh a huna player auh phur thiam zir a ngai.
• Post match Press Conference neih dan tur media-te mumal taka hrilh an ni lo.
ZoFooty Statistics
Aizawl FC Bengaluru FC
BFC : Curtis Osano 26'
0 Goal 1
61% Ball Possession 39%
15(6) Shots (On Target) 9(2)
372(298) Pass (Complete) 227(159)
12 Fouls 18
1 Offside 1
11 Corner Kick 2
2 Yellow Card 2
0 Red Card 0