Vannei taka in-draw Chelsea an lawm

Stamford Bridge-ah Chelsea-in hun tawp dawna captain John Terry goal sawisel hlawh tak hmangin Everton an draw a, vannei takin point khat an hlawh.

Goal ruk

First half-ah goal a lut lo a, goal hi football hmuhnawm tehna a nih chuan second half-a Chelsea leh Everton inkhel chu hmuhnawm tak a ni.

Blues captain Terry-a'n mi­nute 49-naah an lamah a ti lut a, Toffees midfielder Ross Barkley-a'n goal ban a pet per a, minute 55-naah Kevin Mirallas-a'n Everton goal hnihna a khung leh bawk avangin Chelsea dinhmun a chhe hman hle.

Amaherawhchu minute hnih thum chhung lekin inkhel boruak a dang a, Diego Costa-a'n minute 64-naa goal a khung hnu minute hnih lekah ram tana a khelhpui Cesc Fagregas-a'n goal khung lehin Chelsea-in an siphurh an sut zo.

Injury time-ah Everton substitute Ramiro Funes Mori-a'n a kheng lut a, chakpuina goal atana mawi ni mah se Chelsea captain Terry-a'n feet thum zeta offside-in an siphurh a sut. Hun tawpa hnaiha goal inang lo tak pahnih hlut dan a inan reng avangin Everton leh Chelsea ten point khat ve ve an hlawh chhuak.

Everton manager Roberto Martinez chuan, "Injury time minute sarih pek a ni a, minute 97 leh second 51-ah kan lamah feet ruk laia offside in goal an khung a. Referee thutluknaah ka rilru a na tak zet a, point thum kan phu a ni," tiin an vanduai thu a sawi.

Chelsea manager lailawk Guus Hiddink chuan, "Goal hnih kan chhuah takah kha chuan risk kan la a, ka player-te an ṭan theih zarah a hlawhtling a ni. Kan goal chhuah danah chuan ka lungawi lo a, kan rilru put hmangah erawh ka lungawi hle," tiin a sawi.

Dutch manager Hiddink-a hnuaiah Chelsea-in an mualah chak an la nei lo. Blues hian Premier League match ngaah vawi li an inhnehtawk.

Inkhel dang

Southampton-in season bul ṭan ṭha lo mah se ngai an awh chho tawh tih a lang ṭan a, Inrinni zan khan James Ward-Prowse goal hnih leh Serbian forward Dusan Tadic goal hmangin West Brom 3-0 in an sawp.

Premier League kai thar pahnih inkhelah nikum Cham­pionship champion Bournemouth an chungnung. Cherries tan Dan Gosling, Declan Rudd leh Afobe ten goal an khung a, Norwich 3-0 in an sawp.

Newcastle-in Manchester United laka point hlu tak an hlawhchhuah hnuah West Brom 2-1 in an hneh. Magpies tan Ayoze Perez leh Georginio Wijnaldum te'n goal an khung a, player thar Jonjo Shelvey a khelṭha hle. Swansea player hlui Shelvey hian vawi 60 zet pass a nei a, a passing accuracy hi 91.7% a ni.