Awlsam taka Sunderland hnehtu Spurs

Tottenham Hotspur-in Champions League an beiseina an chhem nung zel a, Inrinni zan khan Premier League table mawngphaha talbuai mek Sunderland chu 4-1 in an sawp. Spurs hian Premier League table-ah palina dinhmun an luah mek.

White Hart Lane-a inkhelah Sunder­land-in besei loh takin Patrick van Aanholt-a goal hmangin hmahruai mah se Spurs chhaih kawlhna goal mai a ni a, mualneitu team hian goal liin an chhang let.

Spurs tan Christian Eriksen chuan goal hnih a khung bakah Mousa Dembele leh Harry Kane-te'n goal khat ve ve an khung a, English striker goal khung hi penalty aṭanga lut a ni.

Tottenham boss Mauricio Pochettino chuan, "Leicester laka kan chak loh hnuah hnehna kan chan leh tak avangin ka lawm hle a, a pawimawh ber chu nghah peih a ni. Kan inrintawkna hi a ropui ber chu a ni a, squad ṭha tak kan neih zia zaninah khan kan lantir a ni," tiin a naute khelh dana a lawm thu a sawi.™