Djokovic leh Serena an chak nghal

Nimin khan kumina Grand Slam hmasa ber Australian Open chu khelh ṭan a ni a, mipa leh hmeichhe lamah world number 1 pahnih Novak Djokovic leh Serena Williams te chuan harsa lo takin hnehna an chang.

Rod Laver Court-a inkhelah champion lai Djokovic-a'n winners vawi 40 zet a neih bakah vawi 10 ace hlap chhuak chungin 6-3, 6-2, 6-4 in kum 19-a upa Hyeon Chun chu a hneh.

Serbian thiampuipa Djokovic hi kum 2008 khan a Grand Slam hmasa ber ni turin Australian Open-ah a champion a, tunah hian he inelnaah hian vawi nga a champion tawh.

Kum 28-a upa Djokovic chuan, "Rod Laver Arena-a ka inkhel leh thei hi ka lawm a, he hmun hi hlawhtlinna ka lo chan tawh ṭhinna hmun a nih avangin hmun dang zawng aiin ka tan a hlu bik. Bul ṭanna ṭha tak a ni chuan ka hria, ka khingpui Hyeon Chun kha a kum a la tam lo hle. Mahse a inkhelh danah a puitling tawh hlein ka hria, a hmu hun kal zel turah duhsakna ka hlan a ni," a ti.

Inkhel dangah Grand Slam vawi 17 champion tawh Roger Federer pawn a match hmasa berah harsatna a tawk lo a, Nikoloz Basilashvili chu 6-2, 6-1, 6-2 in a hneh.

Swiss thiampuipa Federer hian Basilashvili lakah hian vawi thum chiah double foult a nei a, ace vawi ruk a siam thung.

Hmeichhe inelna lamah Williams hian world number 34 Camila Giorgi lakah darkar khat leh minute 43 chhungin 6-4, 7-5 in hnehna a chang.

Williams hian Grand Slam title 21 a la tawh a, Steffi Graf-i record vawi 22 tluk turin vawi khat champion chiah a mamawh tawh.

Kum 34-a upa Williams hian a khup vei lamah na a neih avangin kuminah a la inkhel lo tih theih a ni. Hopman Cup-ah set khat lek a khelh hnuah a inhnukdawk a, kumina competitive match a khelh tluanna hmasa berah hnehna a chang lehnghal a ni. Second round-ah chuan Chinese Taipei star Hsieh Su-Wei nen an inhmachhawn zui leh dawn a ni.

Williams chuan, "Darkar khat chuang na nei loin ka inkhel thei tawh a, ka ṭhat chhoh zel ka beisei tawh. Inkhel awlsam tak a ni lo a, ka inkhelh mumal loh hnua ka lo kir lehna hmasa berah hnehna ka chan nghal avangin ka lawm hle," tiin a chak vanga a lawm thu a sawi.