Zaninah Haier ADFA First Division Final

Aizawl DFA hnuaia football club-te inelna sang ber Haier ADFA First Division final chu zanin dar 6:00 hian Lammualah Aizawl FC Academy leh Chhinga Veng FC ten an khel dawn.

Aizawl FC Academy-in final lut turin league match vawi 14 khelhah hneh loh an tawng lo. Nicky Malsawmtluanga hnuaia khel Aizawl FC rawltharte hian final-a an hmachhawn tur Chhinga Veng bakah Chawnpui leh Chaltlang te vawi khat ṭheuh an draw a, league stage-ah vawi hnih ṭheuh an inkhelh kual avangin Academy hian a inhnehtawkpuite hi vawi khat ṭheuh an hneh bawk. First division team pali dang Ramhlun North, FC Kulikawn, Electric Veng leh Upper Republic-te chu vawi hnih ṭheuh an hneh.

League stage hi nikum lama zawh ni tawh mah se Aizawl FC Academy-in I League Under 18 qualifier an khelh avangin final hun hi sawn a ni. Sikkim-a qualifier khelhah Aizawl FC rawltharte hian an khingpuite chiang taka hnehin final round an lut a, match lia goal sarih khungtu Rochharzela chu top scorer a ni.

AFC Academy forward Rochharzela hian an veng leh a club hlui Chhinga Veng FC a hmachhawn dawn. Goal khung kawnga Rochhara pui turin Nicky-a hote hian Johny VL Muanpuia, Lalremsanga te bakah tawnhriat nei ṭha H. Lalnunzira-te an kawl a, tlarhnung lamah keeper David Lalrinpuia, defender Lallawmawma leh midfielder ṭha Lalawmpuia (Opitea) te an neih bawk avangin chak tura rinkai zawk an ni. Chutihrualin league ṭan tirha match ruk aṭanga goal kaw khung thei Jonathan Lalrawngbawla inhliam erawh an tuar thei bawk.

AFC Academy coach Nicky Mal-sawmtluanga, "Chhinga Veng hi mahni awmna veng ni mah se football-ah chuan kan veng club hi kan elpui an ni. Hneh ngei kan tum a, kan chak ngei pawh ka ring bawk," tiin a sawi.

Aizawl FC Academy-in league stage thunun mah se Chhinga Veng hi ṭantu nei ṭha an ni a, manager Lalthanzama Vanchhawng leh coach Lalremruata te kaihhruaina hnuaiah final-a upset thlen thei dinhmunah an ding.

Chhinga Veng tlarhnungah tawnhriat nei ṭha C. Lalbiaksanga a pawimawh a, Armed Veng South defender Sangtea hi inhliam vanga final a thlen theih chuan Chhinga Veng tan channa nasa tak a ni ang. League stage pahnihna hian tlarhma lamah MPL U17 best forward ni tawh Lalrinhlua leh Chanmari U17 champion puitu Lalsawmzela an kawl a, captain Sangtea a dam bawk chuan final-a talbuai tur an ni lo.

Chhinga Veng manager Lalthan-zama Vanchhawng chuan, "Kan intawn hnuhnun ber ṭumin hneh lo mah ila, final kan luh takah chuan result ṭha zawkah kan ngai. Team
ṭha lo zawka ngaih kan nih avangin pressure kan nei lo a, chutihrualin chak lo turin final khelh kan tum lo. Kan coach Lalremruata a ṭha a, min chak pui ngei ka ring. Tun dinhmun kan thlenna kawnga pawimawh sponsor-tu PRAN leh JSJ Fitpro chungah lawmthu kan sawi a, final-ah hian league stage-a ṭha taka min ṭawiawmtu veng chhung mipuiten min ṭawiawm leh ngei ka beisei," tiin vengchhung mipui pawimawhna a sawi lang.

Final hi Zonet-ah live telecast a ni dawn a, inkhel en man hi Rs 30 a ni ang.