Rodgers-a'n chawlh rih a duh

Liverpool manager hlui Brendan Rodgers chuan club enkawl lama kir a tum tawh rih loh thu sawiin club a enkawl leh dawn a nih chuan England pawn lama kal a chak thu a sawi.

Kum 42-a upa manager chuan, "Tunah rih chuan hun thawl neih ka duh a, chumi zawhah chuan chona thar hmachhawn leh tur ka ngaihtuah ang. Nipui lo thleng phawt se engkim a chiang ang," tiin season laklawha club enkawl a tum lo.

October thlaa Liverpool-in an manager aṭanga an chawlhtir tak Rodgers hian Anfield a chhuahsan hnuah club enkawl nei loin a hun a hmang mek a, Spanish ṭawng thiam tak manager hian Spain lam a pan a nih pawhin a mak lo ang.

Northern Ireland lam chhuak Rodgers chuan, "Anfield ka chhuahsan hnuah club tam takin an club enkawl turin min sawm a, England leh ram pawn lamah min sawmtu tam tak an awm a ni. Mahse, tunah rih chuan rilru hahchawlh a, phurna thar ka neih huna lo kir leh hi ka duh. Ka club enkawl tur chuan hmachhawp phurawm tak an nei tur a ni," tiin chohna phurawm a ngaih pawimawh ber thu a sawi.