Southampton striker thar Charlie Austin
Premier League club Southampton chuan Queen Park Rangers striker Charlie Austin chu pound maktaduai 4-in an la lut. Kum 26-a upa striker hian St.Mary's Stadium-ah kum li leh a chanve cham turin contract a ziak.
Austin hian season hmasa khan Premier League-ah a club QPR in hamtan pui thei lo mah se mimal takin a che ṭha hle a, Premier League match 35-a inlanah goal 18 a khung thei a ni.
Saints manager Ro-nald Koeman chuan, "Janua-ry transfer-a lakluh tum hian Austin hi kan lo hual lawk tawh a, Premier League-a a goal khung zat hi striker naran tan tih theih a ni lo," tiin a striker thar chu a fak hle.
Koeman chuan sawi chhunzawmin, "Kan squad min rawn zawm hlan kan nghakhlel tawh takzet a ni. Austin awm hunah chuan khelhna hmun inchuhin ka striker-te an inel nasa lehzual dawn tihna a ni a, chu chu team tan a ṭha a ni," a ti.
Dutch manager chuan Liverpool nena sawizawm a striker Shane Long chu a chhuah loh tur thu a tichiang bawk. Koeman chuan, "January-ah ka player tumah kan hralh dawn lo a, season tawp lam chu sawi thei lo mah ila tun thlasik transfer-ah chuan tumah kan hralh lo ang. Squad chhah zawk neih kan duh a, chuvanga Charlie pawh la lut kan ni," tiin a player-te chhuahtir tumna a neih loh thu a sawi.
English striker hian tun season-ah QPR tan Championship-ah match 16 khelin goal sawm a khung a, mahse December thla laihawl aṭang khan hliam vangin khelmual chhungah a hmel a la lan leh lo.
QPR director of football Les Ferdinand chuan kumin nipui transfer-a a contract tawp mai tawh tur Austin an hralh chhan sawiin, "Austin hi season tawp ruala a thlawna chhuak mai thei a nih avangin kan club tana ṭha tur ber kan ngaihtuah a, sum lama kan hlawkpui theih dan tur ngaihtuahin chhuahtir mai hi a ṭha niin kan hre ta a ni," a ti.
Nikum Nipui transfer laia Newcastle United nena sawizawm Austin chuan, "Southampton-in min duh a ni tih ka hriat khan Saints lo chu ka ngaihtuah thei lo a, ka club kalna ngei tur a ni tih ka hre nghal a ni," tiin Southampton a pan chhan a sawi.