Engvangin nge Aizawla I League match an Live loh?
Mizoram chhung ngeiah India rama football hmanga inelna sang ber I League chu Inrinni khan Rajiv Gandhi Stadium, Mualpuiah Aizawl FC leh Bengaluru FC ten an khel a, Mizo mipuiten Mizoram chanchina hmun pawimawh tak chang tur inkhel pawimawh hi an hlut hle.
Ngaihven a hlawh vang takin I League match hmasa ber hian sawi zui a hlawh a, inkhel entuten an ṭhutna leh ticket man chungchang an sawi zui a, ticket chang lo leh inkhel en ve thei lote zawhna chu 'Engvangin nge Aizawlah I League match an Live loh?' tih a ni.
TV-ah India Football?
1996-97 season aṭanga ṭan National Football League-in India ram football-ah hmasawnna a thlen thei lo. Hei vang hian India rama football thuneitu sang ber AIFF chuan NFL chu kum 2007 khan I League tiin a hming a thlak a, football club-te tan dan awmze nei zawk a duang a, ramchhunga football a lar theih nan mumal taka TV kaltlanga pekchhuah a tum bawk.
I League season khatnaah hian tuna Ten Action kan tih tak Zee Sports hian AIFF nen inremna ziakin league match 90 zinga 45 chu live telecast phalna an lei a, mumal zawkin Indian club-te inkhel a en theih ta bawk. Han peng lawk ila, Ten Sports, Ten Action, Ten Golf leh Ten Cricket te hi Zee Entertainment Enterprises of Taj Television India ta niin thuneitu pakhat hnuaia awm an ni a, Ten Action hi Ten Sports leh Ten Cricket hnua an siam thar a ni.
I League live-a pekchhuah a nih khan Zee Sports chuan an beisei anga sponsorship an hmuh tak loh avangin October 2009 khan AIFF hnenah thawhhona thu an lo thlun tawh chu ennawn nise tiin ngenna a siam a, August 2010 khan AIFF leh Zee Sports chuan kum 2015 thleng contract a neih chu kum nga atan an ti tawi. AIFF lamin IMG Reliance nena inremna ṭha tak an siam zui avangin October 2010-ah contract tawp hma thla nga la awmin Zee Sports nena an thawhdunna an ti tawp. Zee Sports lam hian AIFF chu inremna bawhchhia a puhin zângnadawmna atan Rs. 70 crore an phut a, an inrem zui dan hriat chian theih a ni ta lo.
Zee Sports nena inremna tihtawp a nih avangin 2009-10 season I League chu India ram puma tihchhuah theih a ni ta lo a, Bengali channel tenau Mahuaa Bangla chuan February 3, 2010 khan I League khelh hmabak la awm zawng chu live-a an pekchhuah tur thu puang.
2010-11 season I League tichhuaktu mumal an awm lo a, Brand Value Communications chuan West Bengal leh Assam-ah te tichhuah phalna an chang. Hetia India rama football inelna sang ber I League ber baihvai taka an awm lai hian October 2011 khan Ten Action nen inremna an ziak. 2011-12 season-ah match awm zawng zawng 90 zinga 75 chu live a pekchhuah a ni a, I League match zawng zawng hi a vaia live a ni ngai lo.
2011-12 season a ral a, Ten Sports chuan Indian National team leh I League chu season thum chhung an live tur thu puang a, an inremnaah hian league match 90 aṭangin 75 zel live tura tih a ni. An inremna hi 2014-15 season tawp rualin a tawp a, tuna an contract neih lai mek hi inremna thar a ni.
An live dawn?
Tun season-ah Shillong Lajong-in an muala an match hmasa berah Mumbai FC an draw a, Ten Action in an live lo. Aizawl FC erawh an match hmasa bera champion lai Mohun Bagan nena an khel TV kaltlanga en theih a ni a, Mualpuia an match hmasa pathum erawh pekchhuah a ni dawn lo.
Hei vang hian Mualpuia inkhel zawng zawng Ten Action lamah a en theih dawn lo tihna a ni lo. February 13 hian RG Stadium-ah Aizawl FC leh Shillong Lajong ten Northeast derby an khel dawn a, hei Mualpuia inkhel Ten Action-a live hmasa ber tur a ni.
I League CEO Sunando Dhar chuan, "I League match 72 zinga 45 hi live telecast tur a ni a, an pekchhuah tur chungchanga thutlukna siamtu chu Ten Sports an ni," tiin a sawi. Sunando thusawi aṭanga chiang ta chu Ten Sports hian India ram pum ngaihven tur inkhel an live a, I League kai thar Aizawl FC inkhel TV lama en tam theih a beiseiawm lo a, inkhel en duh tak tak chuan RG Stadium pan mai a finthlak ang.
With inputs from ZoFooty