Real chak chiang; Barca an duai bik lo

Zinedine Zidane-a en-kawlna hnuaiah Real Madrid-in goal khung an ṭhulh thei lo - Pathianni zan khan Sporting Gijon chu 5-1 in an sawp. Spanish club lian hian French legend enkawlna hnuaiah match hnih khel tawhin goal sawm an khung a, goal khat chiah an chhuah.

Santiago Bernabeu-a in-khelah minute 18 an khelh tlin meuh chuan Real-in goal li an khung tawh. Gareth Bale-a'n goal hmahruai a khung hnuah Cristiano Ronaldo-a'n goal hnihin a chhunzawm a, Benzema-a'n minute 12-naah a khung ve bawk.

French striker Benzema-a'n chawlhlawk hmain Real goal ngana a khung leh a, second half-ah Sporting Gijon-in Isma Lopez goal khat khung hmangin chhanglet ve mah se awmzia a nei thui lo.

Real-in league match-a goal an khung hnuhnung 24 zinga 23 hi BBC tia hminglem an vuahsak Bale, Benzema leh Ronaldo-te khung a ni. Ronaldo-a'n goal ruk khungin Bale-a'n goal kua a khung a, Karim Benzema chuan goal riat a khung bawk.

Lawm a kim lo

Real-in goal nga lai khung mah se an player pawimawh Bale leh Benzema chu hliam vangin lakchhuah an ni a, Real lawm a kim lo.

Tun hnai match riat a khelh aṭanga goal 11 khung thei Bale hi a chawn hliam vangin chawlhlawk hmaa thlak a ngai a, Benzema chu second half-ah a team-mate James Rodriguez-a'n a pet palh avangin lakchhuah a ngai bawk.

Real thiampuipa Ronaldo erawh a vannei. Portugal captain hian second half ṭan tir lamah Gijon player Nacho Cases chu ball awm loh hnuah pet mah se referee-in a hnawt chhuak lo.

Danglamna thlentu Zidane

Zidane-a'n reserve team coach aṭanga first team coach-a ruat a nih hnuah match hnih a naute a kaihruai tawh a, a match hmasa berah Deportivo La Coruna chu 5-0 in an sawp. Deportivo hi Benitez-a hnuaia an La Liga match hmasa bera 0-0 a an inhnehtawkpui kha a ni.

Real-in an match hnihnaah pawh goal nga tho an khung a, an goal khung pali hi minute 18 chhunga an khung a ni. Real-in kum 1956 hnua inkhel ṭan
aṭanga minute 18 chhunga goal li an khung lehna hmasa ber a ni.

French manager Zidane-a tan chawlh hahdam erawh a la thiang lo - Benitez-a'n Champions League-a 8-0 a Malmo a sawp hnuah La Liga-ah Rayo Vallecano 10-2 in a sawp pui leh a, mah se Spanish manager hi ban a ni ta tho.

Barcelona an vul

Ropui takin Real an chak a - an elpui ber Barcelona-in an nep bik lohzia goal hmangin an tarlang ve lehnghal. Catalan club tan Luis Suarez a ropui a, Uruguayan striker hian 6-0 a Athletic Bilbao an sawpna inkhelah hattrick a siam.

Nou Camp-a inkhelah mikhual team an chesual nghal a, Bilbao keeper goalkeeper Gorka Iraizoz chuan inkhel
ṭan aṭanga minute 7-na lekah Liverpool striker hlui Suarez a ti tlu a, penalty a chawi bakah hnawhchhuah a ni.

Barca thiampuipa Lionel Messi-a'n penalty hi goal-ah a chantir a, Neymar chuan minute 31-naah goal a khung ve leh bawk. Chawlhlawk an hmana Barcelona hmahruaina chu 2-0 a ni.

Second half-ah kar hmasa lawka Ballon d'Or dawngtu Messi chu hliam tenau vanga lakchhuah a ni a, Argentina captain lakchhuah a nih hnuah Suarez-a'n a thiam thil a pholang ṭan.

Suarez hian minute 47, 68 leh 82-ah te goal a khung a, tun season-a inelna hrang hrangah match 29 khel tawhin goal 29 a khungna chiah a ni. Liverpool forward hlui hian Croatian midfielder Ivan Rakitic goal khung tur ṭha takin a siamsak bawk.

Pichichi kalkawng

La Liga-ah team lian pahnih Barcelona leh Real Madrid-in khawvela hmatawng ṭha ber ber an kawl a, season tawpa La Liga-a goal khung hnem berin an dawn ṭhin Pichichi dawng tur sawi thiam a harsa rih hle.

Barcelona inkhelh hmain Real tan Cristiano Ronaldo leh Karim Benzema-te'n goal hnih ve ve an khung a, league-ah goal 16 ve ve an khungna chiah niin goal 15 khung tawh Suarez leh Neymar-te an lehpel.

Mahse, Barca hmatawng pahnih hian an talbuai phah lo. Suarez-a'n goal thum khungin tun season La Liga-a goal 18 a khungna niin league-ah a aia goal khung hnem an awm lo. Neymar pawh a awm mai mai bik lo. Brazil captain hian goal khat khungin league-a goal 16 a khungna a ni a, Benzema leh Ronaldo-te nen an goal khung zat a inang.